18 جاستاعى قازاقستاندىق ديانا مۇرزاعاليەۆا الەۋمەتتىك سالاداعى ايرىقشا ەڭبەگى ءۇشىن ديانا حانشايىم اتىنداعى بەدەلدى سىيلىققا يە بولدى، دەپ حابارلايدى "ادىرنا" ۇلتتىق پورتالى.
بۇل تۋرالى 2024 جىلدىڭ 6 جەلتوقسانىندا ۇلىبريتانيانىڭ قازاقستانداعى ەلشىلىگى حابارلادى.
ديانا ۋەلس حانشايىمىنىڭ قۇرمەتىنە ارنالعان بۇل سىيلىقتى ونىڭ اتىنداعى قايىرىمدىلىق ۇيىمى تابىستايدى. سىيلىقتى حانشايىم ديانانىڭ ۇلدارى – ۋەلس حانزاداسى ۋيليام مەن ساسسەكس گەرتسوگى گارري قولداماق.
ەلشىلىك مالىمەتىنشە، ديانا مۇرزاعاليەۆاعا بالا كەزىنەن سەمەي قالاسى ماڭىندا جۇرگىزىلگەن يادرولىق سىناقتاردىڭ سالدارىنان پايدا بولعان ديزارتريا دياگنوزى قويىلعان.
«ديانا مۇرزاعاليەۆا سويلەۋ قابىلەتى مەن دەنساۋلىعىندا قيىندىقتارعا تاپ بولعان ادامدارعا قولداۋ كورسەتۋگە ءوز ءومىرىن ارنادى. يادرولىق سىناقتاردىڭ سالدارىنان پايدا بولعان ديزارتريامەن كۇرەسىپ، مەكتەپتەگى كەلەمەجدەۋلەر مەن كوپتەگەن وپەراتسيالاردى باستان وتكەردى. بالالىق شاعىندا سويلەي الماسا دا، ءوز ويىن جازۋ ارقىلى جەتكىزىپ، كەيىننەن مۇمكىندىگى شەكتەۋلى بالالاردىڭ ارماندارى تۋرالى وقيعالار جازدى. بۇل وقيعالار ونىڭ «ءۇمىت ءاردايىم جانىمىزدا» («نادەجدا ۆسەگدا س نامي») اتتى انيماتسيالىق فيلمىنە نەگىز بولدى»، – دەپ اتاپ ءوتتى ەلشىلىك.
ديانا مۇرزاعاليەۆا «ينكليۋزيۆ اكادەمياسىن» جانە جاساندى ينتەللەكتكە نەگىزدەلگەن SpeakUp قوسىمشاسىن قۇردى. بۇل قوسىمشا سويلەۋ قابىلەتى بۇزىلعان ادامدارعا كومەكتەسەدى. ونىڭ جۇمىسى ءبىلىم، تەحنولوگيا جانە ستوريتەللينگ ارقىلى جاھاندىق ينكليۋزيانى العا جىلجىتۋعا باعىتتالعان. ەلشىلىك ديانانى «كەدەرگىلەردى بۇزىپ، بۇكىل الەمدە ينكليۋزيانى دامىتىپ جاتقان تۇلعا» دەپ سيپاتتايدى.
سىيلىقتىڭ 25 جىلدىعىنا وراي پرينتس ۋيليام دياناعا ارناعان حاتىندا:
«پرەميانىڭ 25 جىلدىق مەرەيتويىندا الەمنىڭ تۇكپىر-تۇكپىرىنەن كەلگەن جاستاردىڭ ەڭبەگىنىڭ تانىلعانىن كورۋ كەرەمەت. كەيدە الەم بەلگىسىز ءارى كۇردەلى كورىنۋى مۇمكىن، بىراق سىزدەر كوپ كۇش جۇمساپ، كەدەرگىلەردى جەڭىپ، وڭ وزگەرىستەرگە ۇلەس قوسىپ جاتقاندارىڭىز انىق. سىزدەرگە سىيلىق تابىستالعان كەزدە، مەنىڭ انام، حانشايىم ديانا، سىزدەرمەن ماقتانار ەدى. بۇل سىيلىق سىزدەردىڭ ءارى قاراي دا ادامدارعا كومەكتەسىپ، اينالاڭىزداعى الەمدى جاقسارتۋعا كۇش بەرۋىن تىلەيمىن»، – دەپ جازدى.
ديانا بۇل كۇننىڭ ءوزى ءۇشىن وتە ماڭىزدى ەكەنىن ايتىپ، بۇل ءساتتى ءومىر بويى ەسىندە ساقتايتىنىن جەتكىزدى.
«بۇگىن مەن ءۇشىن ەرەكشە كۇن. مەن ساسسەكس گەرتسوگى ۋيليامنان العىس حات الىپ، حانشايىم ديانا سىيلىعىنىڭ يەگەرى اتانعانىمدى ماقتانىشپەن جاريالايمىن!» – دەپ جازدى ول Instagram پاراقشاسىندا.
ديانا ءوزىنىڭ بالا كەزىندەگى ارمانى – ەرەكشە قاجەتتىلىكتەرى بار بالالارعا كومەكتەسۋ ەكەنىن ەسكە الىپ، وسى ارمان ونى بۇگىنگى جەتىستىككە جەتكىزگەنىن ايتتى.
«ءپرينتستىڭ حاتىن وقىعاندا، مەنىڭ كوزىمە جاس كەلدى. مەن ءبىر كەزدەرى كۇندەلىگىمە ەرەكشە قاجەتتىلىكتەرى بار بالالارعا كومەكتەسۋ تۋرالى جازعان كىشكەنتاي قىزدى ەسكە الدىم. ول كەزدە مۇنداي ۋادە مەنى وسىنداي كەرەمەت تانۋعا جەتكىزەدى دەپ ويلاعان ەمەسپىن»، – دەپ ءبولىستى قازاقستاندىق بويجەتكەن.
سوڭىندا ديانا وزىنە قولداۋ كورسەتكەن اتا-اناسىنا، ۇستازدارىنا، دوستارىنا، يۋنيسەف ۇيلەستىرۋشىلەرىنە جانە Diana Award ۇيىمىنىڭ ۇجىمىنا العىس ايتىپ، بارشا ادامداردى الەمدى جاقسارتۋعا ۇلەس قوسۋعا شاقىردى.
