پاۆلوداردا فيزيكا ءپانىنىڭ مۇعالىمى TikTok-تاعى ءسوز تىركەستەرىن قايتالاپ ايتقان وقۋشىنى ىشىنەن ۇرىپ، جۇمىستان شىعارىلدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
الەۋمەتتىك جەلىدە وقۋشىنىڭ ارەكەتى مەن مۇعالىمنىڭ جاۋابى تۇسىرىلگەن ۆيدەو تارادى. وندا وقۋشى پارتادا وتىرىپ، انيمە كەيىپكەرىنىڭ ۇرانىن قايتالاپ ايتىپ، سودان كەيىن ورنىنان تۇرىپ، ارتىنان ورىندىققا شىعىپ سول سوزدەردى ايقايلاپ ايتقانىن كورۋگە بولادى. سول ساتتە مۇعالىم ونىڭ ارەكەتىنە تاڭدانىپ: «اۋىرىپ تۇرسىڭ با؟» دەپ سۇرايدى دا، بىرنەشە سەكۋندتان كەيىن وقۋشىعا جاقىنداپ، ىشىنەن ۇرىپ، ورنىنا وتىرۋىن تالاپ ەتەدى.
بەلگىلى بولعانداي، وقۋشى بۇل انيمە كەيىپكەرىنىڭ «اقىماق» دەگەندى بىلدىرەتىن ءسوز تىركەسىن سىنىپتاستارىمەن باستەسكەن سوڭ ايقايلاپ ايتقان. پاۆلودار قالاسىنىڭ ءبىلىم ءبولىمىنىڭ مالىمەتىنشە، وقيعا فيزيكا ساباعىندا ورىن العان.
«وقۋشى سىنىپتاستارىمەن باستەسكەننەن كەيىن TikTok-تاعى ترەندكە اينالعان دىبىستى ورىندىققا شىعىپ، ايقايلاي باستادى. مۇعالىمنىڭ ەسكەرتۋىنە قۇلاق اسپاعاندىقتان، پەداگوگ فيزيكالىق كۇش قولدانعان»، – دەپ ءتۇسىندىردى پاۆلودار قالاسىنىڭ ءبىلىم ءبولىمىنىڭ باسشىسى قۋانىش قىدىرالين.
مەكتەپتە قىزمەتتىك تەكسەرىس جۇرگىزىلگەنى بەلگىلى بولدى.
«مەكتەپ ديرەكتورى ءجاسوسپىرىمنىڭ اتا-اناسىمەن كەزدەسىپ، بالامەن اڭگىمەلەستى. اناسى مەن بالانىڭ تاراپىنان شاعىم تۇسپەگەن. دەگەنمەن مۇعالىمنىڭ مۇنداي ارەكەتى، ارينە، قولايسىز. وسى جاعدايدان كەيىن مۇعالىم ءوز ەركىمەن جۇمىستان كەتۋ تۋرالى ارىز جازىپ، قىزمەتىنەن بوساتىلدى»، – دەدى قۋانىش قىدىرالين.
ايتا كەتەيىك، الەۋمەتتىك جەلى قولدانۋشىلارى مەكتەپ باسشىلىعىنان مۇعالىمدى جۇمىستان شىعارماۋدى سۇراپ، وقۋشىنىڭ اتا-اناسىن بالاسىنىڭ ارەكەتى ءۇشىن جاۋاپقا تارتۋدى ۇسىنعان.
