رەسەيدىڭ بىرقاتار وڭىرىندە قۇتقارۋ اۆياتسياسىنا تىكۇشاقتار جەتپەي جاتقانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
قازىرگى تاڭدا رەسەيدە اۆياتسيا بەكىتكەن 111 كەزەكشىلىك پۋنكتىنىڭ 31-ىندە قۇتقارۋ ماقساتىندا قولدانىلاتىن مي-8 تىكۇشاقتارى مەن ان-26 ۇشاقتارى جەتكىلىكسىز. ماماندار بۇل جاعداي اپات قۇرباندارىنا ۋاقىتىلى كومەك كورسەتۋگە كەرى اسەر ەتۋى مۇمكىن ەكەنىن اتاپ وتىر.
انىقتاماعا سايكەس، روساۆياتسيا قۇرامىندا اۆياتسيالىق-عارىشتىق ىزدەۋ جانە قۇتقارۋدىڭ بىرىڭعاي جۇيەسى جۇمىس ىستەيدى. بۇل قىزمەت اۋە جانە تەڭىز اپاتتارى كەزىندە زارداپ شەككەندەردى قۇتقارۋمەن اينالىسادى. قۇتقارۋشىلار تىكۇشاقتاردى اۋە كومپانيالارىنان جالعا الىپ، توتەنشە جاعداي ورنىنا اتتانادى.
اۋە كەمەلەرىنىڭ تاپشىلىعى ۆورونەج، كالينينگراد، ەكاتەرينبۋرگ، نوۆوسيبيرسك، چيتا، قازان، سيمفەروپول، يۋجنو-ساحالينسك، كومسومولسك-نا-امۋرە، نيكولاەۆسك-نا-امۋرە، روستوۆ-نا-دونۋ، نيجني نوۆگورود، جۋكوۆسكي، گورنو-التايسك جانە اباكان قالالارىندا تىركەلگەن.
تاسىمالداۋشى كومپانيالار مەملەكەتتىك تاريفتەر كوتەرىلمەيىنشە ىزدەۋ-قۇتقارۋ جۇمىستارىنا قاتىسۋعا قۇلىقسىز. ساراپشىلاردىڭ ايتۋىنشا، تومەن تاريفتەر تىكۇشاقتاردىڭ تەحنيكالىق جارامدىلىعىن قامتاماسىز ەتۋگە مۇمكىندىك بەرمەي وتىر.
2025 جىلى كەمىندە 11 قالادا مي-8 تىكۇشاقتارىن پايدالانۋ ارقىلى ىزدەۋ-قۇتقارۋ جۇمىستارىن ۇيىمداستىرۋعا ارنالعان مەملەكەتتىك تەندەرلەرگە قاتىسۋشىلار تابىلماعان. اباكاندا تەندەر ءۇش رەت وتپەي قالعان. كەيىن كەلىسىمشارت قۇنى 114 ملن رۋبلدەن 119 ملن رۋبلگە دەيىن وسسە دە، بۇل جاعداي وزگەرمەگەن.
