Pavlodarda fızıka pániniń muǵalimi TikTok-taǵy sóz tirkesterin qaıtalap aıtqan oqýshyny ishinen uryp, jumystan shyǵaryldy, dep habarlaıdy "Adyrna" ulttyq portaly Tengrinews.kz-ke silteme jasap.
Áleýmettik jelide oqýshynyń áreketi men muǵalimniń jaýaby túsirilgen vıdeo tarady. Onda oqýshy partada otyryp, anıme keıipkeriniń uranyn qaıtalap aıtyp, sodan keıin ornynan turyp, artynan oryndyqqa shyǵyp sol sózderdi aıqaılap aıtqanyn kórýge bolady. Sol sátte muǵalim onyń áreketine tańdanyp: «Aýyryp tursyń ba?» dep suraıdy da, birneshe sekýndtan keıin oqýshyǵa jaqyndap, ishinen uryp, ornyna otyrýyn talap etedi.
Belgili bolǵandaı, oqýshy bul anıme keıipkeriniń «aqymaq» degendi bildiretin sóz tirkesin synyptastarymen bástesken soń aıqaılap aıtqan. Pavlodar qalasynyń bilim bóliminiń málimetinshe, oqıǵa fızıka sabaǵynda oryn alǵan.
«Oqýshy synyptastarymen básteskennen keıin TikTok-taǵy trendke aınalǵan dybysty oryndyqqa shyǵyp, aıqaılaı bastady. Muǵalimniń eskertýine qulaq aspaǵandyqtan, pedagog fızıkalyq kúsh qoldanǵan», – dep túsindirdi Pavlodar qalasynyń bilim bóliminiń basshysy Qýanysh Qydyrálın.
Mektepte qyzmettik tekseris júrgizilgeni belgili boldy.
«Mektep dırektory jasóspirimniń ata-anasymen kezdesip, balamen áńgimelesti. Anasy men balanyń tarapynan shaǵym túspegen. Degenmen muǵalimniń mundaı áreketi, árıne, qolaısyz. Osy jaǵdaıdan keıin muǵalim óz erkimen jumystan ketý týraly aryz jazyp, qyzmetinen bosatyldy», – dedi Qýanysh Qydyrálın.
Aıta keteıik, áleýmettik jeli qoldanýshylary mektep basshylyǵynan muǵalimdi jumystan shyǵarmaýdy surap, oqýshynyń ata-anasyn balasynyń áreketi úshin jaýapqa tartýdy usynǵan.
