ادام ساۋداسى ماسەلەسى بۇكىل الەمدە وزەكتى جانە ەسىرتكى مەن ونى ساتۋدان كەيىنگى قىلمىستىق كىرىس كولەمى بويىنشا ءۇشىنشى ورىندا تۇر.
قازىرگى قۇلدىق فاكتىلەرى ءبىزدىڭ ەلدە دە تىركەلگەن. قازاقستاندا جىل سايىن ىشكى ىستەر ورگاندارى وسىنداي 150-گە جۋىق قىلمىستى انىقتايدى. ەلىمىزدە ادام ساۋداسىنا قارسى كۇرەس تۋرالى زاڭ بويىنشا جۇمىس ەكى جىلدان بەرى جۇرگىزىلىپ كەلەدى. قۇجاتقا ەنگىزىلگەن نورمالار مەن تۇزەتۋلەردى تالقىلاۋعا 50-دەن استام ساراپشى قاتىستى. 100-دەن استام وتىرىس ءوتىپ، ولاردىڭ ارقايسىسىندا زاڭ جوباسىنىڭ ءاربىر تارماعى مۇقيات قارالدى. ازىرلەۋشىلەردىڭ ايتۋىنشا، جاڭا قۇجات ادام ساۋداسى قۇرباندارىنىڭ بارلىق قولدانىستاعى قۇقىقتارىن جانە ولارمەن جۇمىس ىستەۋ الگوريتمىن قاراستىرادى.
«ورتالىق ازيا ءوڭىر رەتىندە كوشى-قون پروتسەستەرىنە وتە تاۋەلدى. كوشى-قون ديناميكاسى وتە بەلسەندى، مۇندا ءبىز ايماقتاعى، ونىڭ ىشىندە قازاقستانداعى كەم دەگەندە 5-6 ميلليون ميگرانت تۋرالى ايتىپ وتىرمىز. ارينە، مۇنداي كەزدە ادام ساۋداسى قۇبىلىسى دا كەڭ تاراعان. ءبىز مۇندا جىنىستىق قاناۋمەن قاتار ەڭبەك قاناۋىن قوسا العانداعى ءۇردىستى كورىپ وتىرمىز. ماماندار زاڭنىڭ قابىلدانۋى جەكە تۇلعاعا قارسى قىلمىسپەن كۇرەستە جاسالعان ۇلكەن قادام ەكەنىن ايتادى. بۇل ادام ساۋداسىمەن ءتيىمدى كۇرەسۋگە مۇمكىندىك بەرىپ قانا قويمايدى، ەڭ باستىسى، كوشەدە جايباراقات ءجۇرىپ، ادال ەڭبەك ەتىپ، ەشنارسەدەن قورىقپاي جۇرگەن ءاربىر ادامعا جەكە قاۋىپسىزدىكتى سەزىنۋگە ىقپال ەتەدى»،- حالىقارالىق كوشى-قون ۇيىمى ميسسياسىنىڭ جەتەكشىسى زەينال گادجيەۆ.
قازاقستاندا جىنىستىق قاناۋ، ەڭبەككە جەگۋ، كۇشتەپ قايىر سۇراۋ جانە بالا اسىراپ الۋ ماقساتىندا ساتۋ، جاڭا تۋعان نارەستەلەردى ساتۋ سياقتى ادام ساۋداسىنا قاتىستى قىلمىستىق ءىس تىركەلگەن. وسىعان وراي، جاڭا زاڭ جوباسى ازاماتتاردى زاڭسىز قاناۋعا تارتۋ ادىستەرىن قامتيتىن «ادام ساۋداسى» انىقتاماسىن كەڭەيتەدى. بۇل قورقىتۋ نەمەسە كۇش قولدانۋ، ادام ۇرلاۋ، الاياقتىق، الداۋ، بيلىكتى اسىرا پايدالانۋ جانە پارا الۋ. قالبىلدانعان زاڭ اياسىندا قۇقىق قورعاۋ ورگاندارى اتالعان ىستەردىڭ بارلىعى بويىنشا قىلمىستىق ءىس قوزعاۋعا مۇمكىندىك تۋدى.
