پرەزيدەنت قاسىم-جومارت توقاەۆ ءوزىنىڭ جولداۋلارىندا اۋىل شارۋاشىلىعىن دامىتۋعا ەرەكشە نازار اۋدارىپ كەلەدى. ونىڭ ىشىندە "تاۋارلىق نەسيە" باعدارلاماسى اۋىل تۇرعىندارىنىڭ ءال-اۋقاتىن ارتتىرۋ مەن اۋىل شارۋاشىلىعىن قولداۋعا باعىتتالعان ماڭىزدى باستاما رەتىندە قاراستىرىلعان.
مەملەكەت باسشىسى: «بىلتىر «اۋىل اماناتى» جوباسى باستالدى. جالپى ناتيجەسى جامان ەمەس. اۋىل شارۋاشىلىعىنداعى ەڭبەك ونىمدىلىگىن ارتتىرۋ ءۇشىن جاڭا قۇرالداردى ەنگىزۋ قاجەت. سولاردىڭ ءبىرى – تاۋارلىق نەسيە جۇيەسى. بۇل جۇيە اۋىل تۇرعىندارىنا مال باسىن كوبەيتۋگە جانە جەرگىلىكتى ءوندىرىستى دامىتۋعا مۇمكىندىك بەرەدى.»
تاۋارلىق نەسيە بەرۋ قاراعاندى وبلىسى بۇقار جىراۋ اۋدانىندا جۇزەگە اسىرىلا باستادى.
باعدارلامانىڭ العاشقى قاتىسۋشىسى - ەۆگەني ەرعاليۇلى اپەيىسوۆ باسقاراتىن «شاتان» شارۋا قوجالىعى. بۇل قوجالىق بەلاعاش اۋىلىنىڭ تۇرعىندارىنا ءىرى قارا مالدارىن ءبولىپ بەردى. بۇل - از قامتىلعان اۋىل تۇرعىندارىنا دەگەن قامقورلىقتىڭ جارقىن ۇلگىسى، ءارى اۋىل شارۋاشىلىعى سالاسىنىڭ وزگە دە وكىلدەرىنە ۇلگى ونەگە بولادى دەپ سەنەمىز.
تاۋارلىق نەسيە بەرۋ جۇيەسى اۋىلدىقتاردىڭ مال مەن تەحنيكا الۋىنا مۇمكىندىك بەرەدى. قايتارىمى ءونىم تۇرىندە جۇزەگە اسىرىلاتىن بۇل ءادىس اۋىل كاسىپكەرلەرىنە ۇلكەن قولداۋ بولىپ وتىر. پرەزيدەنتتىڭ ايتۋىنشا، مۇنداي جوبالار اۋىل ەكونوميكاسىن تۇراقتى دامىتۋعا جانە حالىقتىڭ تۇرمىس ساپاسىن جاقسارتۋعا ىقپال ەتپەك.
