قازاقستاندا ازاماتتاردىڭ قارىز جۇكتەمەسىنىڭ وسۋىنە جول بەرمەۋ ءۇشىن كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان جاعدايدا ولارعا كەپىلسىز تۇتىنۋشىلىق كرەديتتەر بەرۋگە تىيىم سالۋ جونىندە نورما ەنگىزۋ ۇسىنىلدى، دەپ حابارلايدى "ادىرنا" ۇلتتىق پورتالى. بۇل تۋرالى ءماجىلىس دەپۋتاتى ءۇنزيلا شاپاق مالىمدەدى.
«پروبلەمالىق قارىزدارى بار ازاماتتاردىڭ قارىز جۇكتەمەسىنىڭ وسۋىنە جول بەرمەۋ ءۇشىن كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان جاعدايدا ولارعا كەپىلسىز تۇتىنۋشىلىق كرەديتتەر بەرۋگە تىيىم سالۋ جونىندە نورما ەنگىزىلەدى. بۇدان باسقا، بانكتەر مەن ميكروقارجى ۇيىمدارى ءۇشىن بارلىق قولدانىستاعى (وتەلمەگەن) تۇتىنۋشىلىق كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان سوڭ سىياقى ەسەپتەۋگە تىيىم سالىنادى»، - دەدى شاپاق.
ونىڭ ايتۋىنشا، پروبلەمالىق كرەديتتەردى رەتتەۋ راسىمدەرىن ىسكە اسىرۋ ارقىلى ازاماتتاردىڭ پروبلەمالىق بەرەشەك دەڭگەيىن ازايتۋ ماڭىزدى شارا بولىپ تابىلادى. سوڭعى جىلدارى بانكتەر مەن ميكروقارجى ۇيىمدارى ءوز بالانستارىن تازارتۋ ءۇشىن جەكە تۇلعالاردىڭ پروبلەمالىق كرەديتتەرىن ايتارلىقتاي جەڭىلدىكپەن كوللەكتورلارعا بەرۋ پراكتيكاسى قالىپتاستى. سوندىقتان دا قارىز الۋشىلاردىڭ مەرزىمى وتكەن بەرەشەكتى رەتتەۋ قۇقىقتارىن قورعاۋ ءۇشىن بانكتەر مەن ميكروقارجى ۇيىمدارىنىڭ ازاماتتاردىڭ كرەديتتەرىن تولەم مەرزىمى وتكەن كەزدەن باستاپ 24 ايدان سوڭ جانە كرەديتور بەرەشەكتى رەتتەۋ راسىمدەرىن جۇرگىزگەننەن كەيىن عانا كوللەكتورلىق اگەنتتىكتەرگە ساتۋىنا رۇقسات بەرۋ ۇسىنىلادى.
«2024 جىلعى 1 قاڭتارداعى جاعداي بويىنشا ەلىمىزدىڭ 890 مىڭ ازاماتىنىڭ 382 ملرد. تەڭگە سوماسىنداعى قارىزدارى كوللەكتورلىق اگەنتتىكتەرگە بەرىلگەن»، - دەدى ءۇنزيلا شاپاق.
سونىمەن بىرگە، بۇرىن نەسيەلەرى كوللەكتورلىق اگەنتتىكتەرگە بەرىلگەن قارىز الۋشىلاردى قورعاۋ ءۇشىن ينكاسساتورلاردىڭ جەكە تۇلعالاردان ساتىپ الىنعان نەسيەلەر بويىنشا بەرەشەگىن رەتتەۋ مىندەتى ەنگىزىلۋدە. سونداي-اق، كامەلەتكە تولماعان بالالارى بار وتباسىلاردى جىلۋ ماۋسىمىندا جالعىز باسپاناسىنان شىعارۋعا تىيىم سالىنۋدا.
سونىمەن قاتار، زاڭ جوباسى نەسيەلىك بەرەشەكتى ءوندىرىپ الۋ كەزىندە قارىز الۋشىنىڭ بانك شوتىندا ساقتالاتىن اقشا سوماسىن ەڭ تومەنگى كۇنكورىس دەڭگەيىنىڭ ءبىر ەسەدەن ەكى ەسەگە دەيىن ۇلعايتادى جانە بەرەشەكتى وتەۋ جانە ءوندىرىپ الۋ ءراسىمىنىڭ مەرزىمىن 18 ايدان 12 ايعا دەيىن قىسقارتۋ كوزدەلۋدە.
