اۋعانستان اۋماعىندا TAPI ماگيسترالدى گاز قۇبىرىنىڭ قۇرىلىسى قايتادان باستالدى. بۇل تۋرالى تالىپتەردىڭ رەسمي وكىلى زابيحۋللا مۋدجاحيد ArianaNews باسىلىمىنا ايتتى، دەپ حابارلايدى “ادىرنا” ۇلتتىق پورتالى.
ءمۋدجاحيدتىڭ ايتۋىنشا، جوبانى جۇزەگە اسىرۋ ءۇشىن قاجەتتى تەحنيكالىق جابدىقتار اۋعانستان مەن تۇركىمەنستان اراسىنداعى شەكارا ايماعىنا جەتكىزىلدى، پراكتيكالىق جۇمىستار باستالىپ كەتتى.
«جوبانىڭ ءار ءتۇرلى بولىكتەرىندە كوپتەگەن ماماندار جۇمىس ىستەپ جاتىر، ونىڭ العاشقى فازاسى الداعى ەكى جىلدا اياقتالادى»، — دەدى مۋدجاحيد.
سونىمەن قاتار، ول جاقىن ارادا CASA-1000 جوباسى — ورتالىق ازيادان وڭتۇستىك ازياعا ەلەكتر قۋاتىن جەتكىزۋ جەلىسىنىڭ قۇرىلىسى بويىنشا پراكتيكالىق جۇمىستار باستالاتىنىن قوستى.
«اۋعانستان بىرتىندەپ كۇشەيىپ، ەل ازاماتتارىنا جاقسى جۇمىس ورىندارى بەرىلەدى»، — دەپ اتاپ ءوتتى مۋدجاحيد.
ساراپشىلار دا TAPI جوباسىنىڭ ايماق ەكونوميكاسىنىڭ دامۋىنا ماڭىزدى ءرول اتقاراتىنىن ايتادى. قۇرىلىس اياقتالعان سوڭ 12 مىڭ ادام جۇمىسقا ورنالاسىپ، ەلدىڭ جىلدىق تابىسى 1 ميلليارد دوللاردان ارتادى دەپ كۇتىلۋدە.
ايتا كەتسەك، 2018 جىلى اقپاننىڭ 23-ىندە TAPI اتىمەن بەلگىلى بولعان تۇركىمەنستان – اۋعانستان – پاكىستان – ءۇندىستان گاز قۇبىرىنىڭ اۋعان جەرىندەگى قۇرىلىسى باستالعان بولاتىن. تۇركىمەنستاننىڭ ەڭ ءىرى گالكىنىش گاز كەنىشىنەن جەتكىزىلەتىن قۇبىردىڭ تۇركىمەن-اۋعان شەكاراسىنا دەيىنگى 244 كيلومەترلىك بولىگى تارتىلىپ بولىپ، قۇرىلىس الاڭى سول كەزدە اۋعانستانعا كوشكەن.
جالپى ۇزىندىعى 1814 كيلومەتر دەپ ەسەپتەلگەن جوبانىڭ ەڭ اۋقىمدى بولىگى دە وسى اۋعان جەرىمەن وتكىزىلمەك. اۋعانستان بولىگىندەگى قۇرىلىستىڭ ۇزىندىعى 735 كيلومەتردى قۇرايدى. ودان كەيىن قۇبىر پاكىستان مەن ءۇندىستاندى جالعاستىرۋى ءتيىس.
