كابۋل قالاسىندا بولعان اۋە شابۋىلى سالدارىنان جۇزدەگەن ادام قازا تاپقانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
اۋعانستان بيلىگىنىڭ وكىلى حامدۋللا فيترات مالىمدەۋىنشە، سوققى دۇيسەنبى كۇنى كەشكى ساعات 21:00 شاماسىندا جاسالعان. نىسانا – ەسىرتكىگە تاۋەلدى ادامداردى وڭالتۋعا ارنالعان مەملەكەتتىك اۋرۋحانا بولعان.
الدىن الا دەرەكتەر بويىنشا، شابۋىل سالدارىنان كەمىندە 400 ادام قازا تاۋىپ، تاعى 250-گە جۋىق ادام جارالانعان. عيماراتتىڭ ەداۋىر بولىگى قيراپ، ءورت شىققان.
وقيعا ورنىندا قۇتقارۋ قىزمەتتەرى جۇمىس ىستەپ، ءورتتى ءسوندىرۋ جانە زارداپ شەككەندەردى ىزدەۋ جۇمىستارىن جۇرگىزگەن. كۋاگەرلەردىڭ ايتۋىنشا، اۋرۋحانادان ونداعان ادامنىڭ ءمايىتى شىعارىلعان. اتالعان ورتالىق شامامەن 2000 ادامعا ارنالعانى بەلگىلى. سول سەبەپتى زارداپ شەككەندەر سانى بۇدان دا كوپ بولۋى مۇمكىن دەگەن بولجام بار.
الايدا BBC بۇل مالىمەتتەردى تاۋەلسىز دەرەككوزدەر ارقىلى ءالى تولىق راستاماعانىن حابارلادى.
ءوز كەزەگىندە پاكىستان بيلىگى مەديتسينالىق مەكەمەگە سوققى جاسالعانىن جوققا شىعارىپ وتىر. رەسمي مالىمدەمەدە اۋە وپەراتسياسى تەك اسكەري نىساندار مەن لاڭكەستىك ينفراقۇرىلىمعا قارسى باعىتتالعانى ايتىلعان.
