Auǧanstan aumaǧynda TAPI magistraldy gaz qūbyrynyŋ qūrylysy qaitadan bastaldy. Būl turaly tälıpterdıŋ resmi ökılı Zabihulla Mudjahid ArianaNews basylymyna aitty, dep habarlaidy “Adyrna” ūlttyq portaly.
Mudjahidtıŋ aituynşa, jobany jüzege asyru üşın qajettı tehnikalyq jabdyqtar Auǧanstan men Türkımenstan arasyndaǧy şekara aimaǧyna jetkızıldı, praktikalyq jūmystar bastalyp kettı.
«Jobanyŋ är türlı bölıkterınde köptegen mamandar jūmys ıstep jatyr, onyŋ alǧaşqy fazasy aldaǧy ekı jylda aiaqtalady», — dedı Mudjahid.
Sonymen qatar, ol jaqyn arada CASA-1000 jobasy — Ortalyq Aziiadan Oŋtüstık Aziiaǧa elektr quatyn jetkızu jelısınıŋ qūrylysy boiynşa praktikalyq jūmystar bastalatynyn qosty.
«Auǧanstan bırtındep küşeiıp, el azamattaryna jaqsy jūmys oryndary berıledı», — dep atap öttı Mudjahid.
Sarapşylar da TAPI jobasynyŋ aimaq ekonomikasynyŋ damuyna maŋyzdy röl atqaratynyn aitady. Qūrylys aiaqtalǧan soŋ 12 myŋ adam jūmysqa ornalasyp, eldıŋ jyldyq tabysy 1 milliard dollardan artady dep kütılude.
Aita ketsek, 2018 jyly aqpannyŋ 23-ınde TAPI atymen belgılı bolǧan Türkımenstan – Auǧanstan – Päkıstan – Ündıstan gaz qūbyrynyŋ auǧan jerındegı qūrylysy bastalǧan bolatyn. Türkımenstannyŋ eŋ ırı Galkynyş gaz kenışınen jetkızıletın qūbyrdyŋ türkımen-auǧan şekarasyna deiıngı 244 kilometrlık bölıgı tartylyp bolyp, qūrylys alaŋy sol kezde Auǧanstanǧa köşken.
Jalpy ūzyndyǧy 1814 kilometr dep eseptelgen jobanyŋ eŋ auqymdy bölıgı de osy auǧan jerımen ötkızılmek. Auǧanstan bölıgındegı qūrylystyŋ ūzyndyǧy 735 kilometrdı qūraidy. Odan keiın qūbyr Päkıstan men Ündıstandy jalǧastyruy tiıs.
