اقتاۋ قالاسىنداعى نازارباەۆ زياتكەرلىك مەكتەبىنىڭ وقۋشىلارى «اۋىلداعى ەكى اپتا» الەۋمەتتىك جوباسى اياسىندا جازعى دەمالىستارىن اۋىلدا وتكىزدى، دەپ حابارلايدى “ادىرنا” ۇلتتىق پورتالى.
«اۋىلداعى ەكى اپتا» — ۇلتتىق مادەنيەت پەن سالت-داستۇرلەردى تانىپ، اۋىلدىڭ تۇرمىس-تىرشىلىگىن بىلۋگە باعىتتالعان الەۋمەتتىك تاجىريبە. باستى ماقساتى – اۋىل ومىرىمەن تانىسۋ ارقىلى وقۋشى بويىنا رۋحاني قۇندىلىقتاردى ءسىڭىرۋ، اۋىلداعى ۇلكەندەردىڭ ونەگەلى اڭگىمەسىن تىڭداۋ، قۇربى-قۇرداستارىمەن ارالاسۋ. جوبا اياسىندا اۋىلداعى اتا-اجەسىنە نەمەسە اۋىلداعى تۋىسقاندارىنا بارىپ، اۋىل ومىرىمەن تانىسىپ، كۇندەلىك جۇرگىزىپ، فوتو جانە ۆيدەو ماتەريالدار جيناقتايدى. وسى ماقساتتا ۇيىمداستىرىلعان بۇل الەۋمەتتىك جوباعا زياتكەرلىك مەكتەپتىڭ 7-11 سىنىپ وقۋشىلارى قاتىستى.
«ەكى اپتا اۋىلدا» جوباسى ۇلتتىق قۇندىلىقتاردى ساقتاۋ جانە وقۋشىنىڭ بولاشاق قوعامعا بەيىمدەلۋىنە باعىتتالعان كەرەمەت مۇمكىندىك بەرەتىن جوبا. بۇل جوباعا مەكتەپ وقۋشىلارى اسقان قىزىعۋشىلىقپەن قاتىسادى. كوپ وقۋشىلار وسى جوباعا قاتىسقان كەزدە اۋىلداعى اعايىننىڭ تىنىس تىرشىلىگىمەن ەتەنە تانىس بولدى. اتا-انالار تاراپىنان دا بۇل جوبا وڭ باعاسىن الىپ ۇلگەردى”،- دەيدى نازارباەۆ زياتكەرلىك مەكتەبى ديرەكتورىنىڭ تاربيە ءىسى جونىندەگى ورىنباسارى ايبار بەيبىتۇلى
«اۋىلداعى ەكى اپتا» الەۋمەتتىك جوباسىنا بەلسەندى قاتىسقان بالالار وتە كوپ، سونىڭ ءبىرى زياتكەرلىك مەكتەبىنىڭ سەگىزىنشى سىنىپ وقۋشىسى دامير امانجول. دامير ماڭعىستاۋ وبلىسى، بەينەۋ اۋدانى، سارعا اۋىلىندا ەكى اپتا بولىپ، ەلدىڭ تىنىس تىرشىلىگىمەن تانىسىپ، اۋىلدىڭ الدىڭعى قاتارلى تۇلعالارىمەن سۇقباتتاسىپ قايتقان.
سونداي اق دامير اۋىل اكىمى ەمىل تۇرلانمەن سۇقباتتاسىپ، اۋىلدىڭ حال-احۋالىن سۇراپ، الدا اۋىلدىڭ وركەندەۋى ءۇشىن جاسالاتىن شارالاردىڭ جوسپارىن ءبىلدى.
“سارعا اۋىلىنىڭ تۇرعىندارى مەن وتە جاقسى قارسى الدى. «اۋىلداعى ەكى اپتا» جوباسى اياسىندا اۋىل اكىمىمەن، مەكتەپ، كىتاپحانا قىزمەتكەرلەرىمەن سۇقباتتاستىم. سارعا اۋىلىنىڭ بەلدى ازاماتى، گرەپپلينگتەن الەم چەمپيوناتىنىڭ قولا جۇلدەگەرى، سپورت شەبەرى اقنيەت يمانعاليدەن سۇقبات الۋ مەن ءۇشىن ۇلكەن جەتىستىك بولدى. بارلىعى مەنى قۋانا قارسى الىپ، بىلگەندەرىمەن ءبولىستى. اۋىل بالالارى دا جىلى لەبىزدەرىن ءبىلدىرىپ، اتقا ءمىنۋ، اسىق اتۋ سەكىلدى ۇلتتىق ويىنداردى ۇيرەتتى”،- دەيدى دامير امانجول
«اۋىلداعى 2 اپتا» الەۋمەتتىك جوباسى قازاق بالاسىنداعى ادامگەرشىلىك رۋحاني قۇندىلىقتارىن وزگەرتە الادى. اۋىل — ءداستۇرلى قازاق قوعامىندا ەجەلدەن قالىپتاسقان قاۋىمداستىق. قازاق حالقىنداعى «اۋىل ءتۇبى-بىرلىك، قاۋىم ءتۇبى-تىرلىك» دەگەن ماقال اۋىلدىڭ ەتنيكالىق، ەكونوميكالىق جانە رۋحاني ماڭىزدىلىعىن بىلدىرەدى.
وسىعان بايلانىستى بۇل جوبادا بالانىڭ اۋىلداعى تۇرمىس-تىرشىلىگىنە قىزىعۋشىلىعىن ايقىندايتىن جانە ونى جانداندىرۋىن قاراستىرادى.
”ادىرنا” ۇلتتىق پورتالى
