مەملەكەت باسشىسى قاسىم-جومارت توقاەۆ قىتاي حالىق رەسپۋبليكاسىنىڭ قازاقستانداعى ەلشىسى چجان سياونى قابىلدادى. بۇل تۋرالى بۇگىن، 2 جەلتوقساندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اڭگىمەلەسۋ بارىسىندا پرەزيدەنت قازاقستان مەن قىتايدى عاسىرلارعا ۇلاسقان بەرىك دوستىق پەن تاتۋ كورشىلىك قاتىناستار بايلانىستىراتىنىن اتاپ ءوتتى. قاسىم-جومارت توقاەۆتىڭ پىكىرىنشە، ءوزارا سەنىم مەن قۇرمەتكە نەگىزدەلگەن ءتيىمدى ىنتىماقتاستىقتىڭ نىعايۋىنا ەكى تاراپ تا ۇلەس قوسىپ كەلەدى.
مەملەكەت باسشىسى بۇگىندە قازاقستان مەن قىتايدىڭ ىقپالداستىعى قارقىندى ءارى سان قىرلى سيپات العانىن ايتتى. ەكى ەل اراسىندا بەلسەندى ساياسي ديالوگ قالىپتاستى، ساۋدا-ەكونوميكالىق ارىپتەستىك وركەندەدى، مادەني بايلانىستار جانداندى جانە ءبىلىم بەرۋ باعدارلامالارى مەن عىلىمي جوبالاردىڭ سانى ارتتى. قاۋىپسىزدىك سالاسىندا، اسىرەسە، «ءۇش زۇلىم كۇشكە» قارسى كۇرەس باعىتىندا تىعىز ىنتىماقتاستىق ورناعان. بۇدان بولەك، ەلدەرىمىزدىڭ بۇۇ، شىۇ، اوسشك اياسىنداعى، سونداي-اق «ورتالىق ازيا – قىتاي» فورماتىنداعى حالىقارالىق بايلانىستارى بەلسەندى ءوربىپ كەلەدى. پرەزيدەنتتىڭ ايتۋىنشا، قازاقستان مەن قىتاي تاتۋ كورشىلىك قارىم-قاتىناستىڭ ناعىز ۇلگىسىن كورسەتىپ وتىر.
ءوز كەزەگىندە قىتاي ەلشىسى چجان سياو قاسىم-جومارت توقاەۆقا العىس ايتىپ، بەيجىڭنىڭ جان-جاقتى ستراتەگيالىق سەرىكتەستىكتى ودان ءارى دامىتۋعا بەيىل ەكەنىن راستادى.
مەملەكەت باسشىسى چجان سياونىڭ قازاق-قىتاي دوستىعىن تابىستى دامىتۋعا، مەملەكەتارالىق بايلانىستاردى تەرەڭدەتۋگە قوسقان ۇلەسىن جوعارى باعالاپ، II دارەجەلى «دوستىق» وردەنىمەن ماراپاتتادى.
ايتا كەتۋ كەرەك، قازاقستاندا چجان سياونىڭ قىزمەتى بىرىڭعاي ماقتاۋلى بولعان ەمەس. 2020 جىلى قازاقستان سىرتقى ىستەر مينيسترلىگى قىتايدىڭ قازاقستانداعى ەلشىسى چجان سياونى شاقىرتىپ، قىتايلىق www.sohu.com سايتىنداعى «قازاقستان نەگە قىتايعا ورالۋعا تىرىسادى» اتتى ماقالاعا قاتىستى نارازىلىق بىلدىرگەن بولاتىن.
«قىتاي ەلشىسىنە مۇنداي سيپاتتاعى ماقالانىڭ جاريالانۋى 2019 جىلعى 11 قىركۇيەكتە مەملەكەت باسشىلارى قول قويعان قازاقستان رەسپۋبليكاسى مەن قىتاي حالىق رەسپۋبليكاسىنىڭ بىرلەسكەن مالىمدەمەسىندە ايقىندالعان ماڭگىلىك جان-جاقتى ستراتەگيالىق ارىپتەستىك رۋحىنا سايكەس كەلمەيتىندىگى اتاپ ءوتىلدى»،- دەپ دەگەن سوندا سىرتقى ىستەر مينيسترلىگى.
ءبىر ەسكەرەتىنى، سياونىڭ ءوزى داۋلى مالىمدەمەلەرىمەن جانە جەرگىلىكتى ءباسپاسوز وكىلدەرىنە قارسى اگرەسسياسىمەن تانىمال.
چجان سياو 1964 جىلى جەلتوقساندا قىتايدىڭ گۋاندۋن پروۆينتسياسىنداعى سيننين قالاسىندا دۇنيەگە كەلگەن. 1987-1988 جىلدار ارالىعىندا قىتاي حالىق رەسپۋبليكاسى سىرتقى ىستەر مينيسترلىگى حاتتاما دەپارتامەنتىنىڭ قىزمەتكەرى;
2014-2017 جج – قىتايدىڭ رەسەي فەدەراتسياسىنداعى ەلشىلىگىنىڭ وكىلى;
2001-2003 جج – قىتايدىڭ بەلارۋس رەسپۋبليكاسىنداعى ەلشىلىگىنىڭ كەڭەسشىسى;
2017-2018 جج – قىتاي حالىق رەسپۋبليكاسى سىرتقى ىستەر مينيسترلىگىنىڭ ەۋروپا جانە ورتالىق ازيا دەپارتامەنتىندە جۇمىس ىستەيدى (دەپارتامەنت ديرەكتورى دەڭگەيىندە);
2018 جىلعى 31 تامىزدان باستاپ قىتاي حالىق رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى.
