ءماجىلىس دەپۋتاتى باقىتجان بازاربەك 27 ساۋىردە ماجىلىستەگى ۇكىمەت ساعاتىندا "بولاشاق" باعدارلاماسىندا بىرقاتار زاڭبۇزۋشىلىقتار بارىن ايتىپ، قۇقىق قورعاۋ ورگاندارىنىڭ قاتىسۋىمەن تەكسەرىس جۇرگىزۋدى، سونداي-اق بيۋدجەت قاراجاتىن قايتارۋدى ۇسىندى، دەپ حابارلايدى "ادىرنا".
ونىڭ ايتۋىنشا، "بولاشاق" باعدارلاماسىنا قاتىستى تاسىلدەر مەن ساياساتتى قايتا قاراۋ قاجەت.
"باعدارلاما اياسىندا كادر دايارلاۋ كەزىندە جىبەرىلگەن زاڭبۇزۋشىلىقتاردى ەستىسەڭ، جاعاڭدى ۇستايسىڭ. "بولاشاق" باعدارلاماسى بويىنشا كونكۋرسقا تالاپتارعا مۇلدە سايكەس كەلمەيتىن 881 ۇمىتكەر جىبەرىلگەن. سونىڭ ىشىندە 340 ادام 7 ملرد 659 ملن تەڭگە كولەمىندە ستيپەنديا الىپ، شەتەلدە وقىپ ءجۇر. 15 ۇمىتكەر بويىنشا رەسپۋبليكالىق كوميسسيانىڭ شەشىمى مۇلدە جوق، بىراق ولار ءبىلىم الۋدا. 151 ستيپەنديا جوسپاردان تىس بەرىلگەن، ال ليميتتەن تىس تاعايىندالعان قارجى كولەمى – 2 ملرد 519 ملن تەڭگە. 71 ۇمىتكەر جاسىرىن تۇردە ءبىر-بىرىنە كەپىل بولعان. كەلتىرىلگەن شىعىن – 876 ملن تەڭگە. جالپى، شىنىن ايتقاندا، جاڭالىقتاردى قاراپ وتىرساڭ، كەزەكتى ءبىر اكىم تاعايىندالادى دا، 3-4 جىلدان كەيىن "بولاشاق" تۇلەگى رەتىندە سىبايلاس جەمقورلىق قۇقىقبۇزۋشىلىعىنا بايلانىستى جاۋاپقا تارتىلادى. سوندا ءبىز جالپى "بولاشاق" ارقىلى كىمدەردى دايىنداپ جاتىرمىز دەگەن سۇراق تۋىندايدى", – دەدى دەپۋتات.
ونىڭ ايتۋىنشا، سونداي-اق مينيسترلىكتىڭ جەكەلەگەن لاۋازىمدى تۇلعالارىنا قاتىستى كەيبىر ەپيزودتاردى قىلمىستىق ءىس قوزعاۋعا نەگىز بولاتىن جاعدايلار رەتىندە باعالاۋعا بولادى. وسىعان بايلانىستى ول مىناداي ۇسىنىستارىن ايتتى:
"بىرىنشىدەن – جوعارى اۋديتورلىق پالاتانىڭ (جاپ) ەسەبى قورىتىندىسى بويىنشا "بولاشاق" باعدارلاماسى اياسىندا ماماندار دايارلاۋعا جۇمسالعان قاراجاتتى قايتارۋ جونىندە تالاپ-ارىزدار بەرۋ قاجەت. مەنىڭ باعالاۋىمشا، شامامەن 10 ملرد تەڭگە تۋرالى ءسوز بولىپ وتىر. بۇل – شەتەلدە نەگىزىنەن تەگىن ءبىلىم الىپ جاتقان كەيبىر تۇلعالاردىڭ بالالارى مەن تۋىستارىنا جۇمسالعان قاراجات. مينيسترلىك ولاردىڭ ءتىزىمىن اشىق ءارى ناقتى جاريالاۋى ءتيىس. ەكىنشىدەن – باس پروكۋراتۋرا مەن قۇقىق قورعاۋ ورگاندارىنىڭ قاتىسۋىمەن كوميسسيالار قۇرىپ، جاپ انىقتاعان شامامەن 10 ملرد تەڭگە كولەمىندەگى زاڭبۇزۋشىلىقتارعا قاتىسى بار بارلىق لاۋازىمدى تۇلعالاردى انىقتاۋ قاجەت. ۇشىنشىدەن – جوعارى وقۋ ورىندارىندا تسيفرلىق كۋرستاردى ەنگىزۋىمىز كەرەك. اتاپ ايتقاندا، تسيفرلاندىرۋ نەگىزدەرى، جاساندى ينتەللەكت، اقپاراتتىق رەسۋرستاردى باسقارۋ، ەلەكتروندىق ۇدەرىستەر مەن قۇجات اينالىمى. ياعني، ءبىلىم بەرۋ ستاندارتتارىن تولىق قايتا قاراۋ قاجەت", – دەپ تولىقتىردى ماجىلىسمەن.
سونداي-اق ول عىلىم سالاسىندا لوببي بار ەكەنىن، ال "سكوپۋس" پەن "تومسون رەيتەرس" بازالارىنداعى جاريالانىمدار بيزنەسكە اينالىپ كەتكەنىن اتاپ ءوتتى. وسىعان بايلانىستى، ونىڭ پىكىرىنشە، مۇنداي جاريالانىمداردىڭ مىندەتتىلىگىن الىپ تاستاپ، عىلىمي ەڭبەكتەردى جوعارى اۋديتورلىق پالاتا مەن عىلىم جانە جوعارى ءبىلىم مينيسترلىگى ۇسىنعان ۇلتتىق جۋرنالدار ارقىلى باعالاۋ قاجەت.
