قىرعىزستان پرەزيدەنتى سادىر جاپاروۆ 20 ميلليون دوللارعا مۇلكىن زاڭداستىردى. بۇل تۋرالى ول Facebook-تەگى پاراقشاسىندا جازدى، دەپ حابارلايدى “ادىرنا” ۇلتتىق پورتالى.
«مەنىڭ مۇلكىمنىڭ قۇنى شامامەن 20 ميلليون دوللاردى قۇرايدى. زاڭداستىرۋ ءۇشىن مەن مەملەكەتكە ميلليون سوم تولەدىم (11,2 مىڭ دوللار – فەرعانادان نوتا). بۇل زاڭ بويىنشا تالاپ ەتىلەدى. مەنىڭ شەتەلدە جيناعان اقشام جوق. ال ەگەر بار بولسا، مەن ولاردى ءبىزدىڭ بانكتەرگە سالار ەدىم»، — دەپ جازدى جاپاروۆ.
ول كىرىستەردى زاڭداستىرۋ تۋرالى زاڭنىڭ 2023 جىلى قابىلدانعانىن ەسكە سالدى.
ءبىزدىڭ بارلىعىمىز (قاراپايىم ازاماتتار ەمەس، ورتاشا بيزنەستەن جوعارى كاسىپكەرلەر) مۇلكىمىزدى باسقا بىرەۋدىڭ اتىنا تىركەگەنىمىز جاسىرىن ەمەس. وعان قوسا، ەلىمىزدىڭ ەڭ باي ازاماتتارى ءالى كۇنگە دەيىن ميللياردتاعان اقشاسىن شەتەلدىك بانكتەردە ساقتاۋدا. بىزدە مۇنداي بايلار كوپ. نەلىكتەن بايلىعىن شەتەلدە جاسىرادى دەگەن سۇراققا جاۋاپ قاراپايىم. وسى ۋاقىتقا دەيىن قوماقتى قارجىنىڭ قايدان الىنعانى مەن بۇل قاراجاتقا تولەنەتىن سالىقتىڭ كولەمى كوپ سۇراقتاردى تۋعىزدى. ەندى مۇنداي ماسەلە تۋىنداماس ءۇشىن ءبىز وسى زاڭمەن زاڭداستىرۋ مۇمكىندىگىن جاساپ جاتىرمىز»، - دەپ ءتۇسىندىردى جاپاروۆ.
ول بۇل مۇمكىندىكتى 1 شىلدەگە دەيىن عانا پايدالانۋعا بولاتىنىن، مەملەكەت زاڭداستىرىلعان كاپيتالدىڭ ساقتالۋىنا 100 پايىز كەپىلدىك بەرەتىنىن قوستى.
«مەنىڭ عيماراتتارىم بۇرىن باسقا ادامدارعا تىركەلگەن. قازىر ولاردى زاڭداستىرۋ زاڭى نەگىزىندە تىركەدىم. مەن ۇلگى بولعىم كەلدى جانە ءبىرىنشى بولىپ مۇلكىمدى زاڭداستىردىم»، - دەپ جازدى پرەزيدەنت.
«جەكە تۇلعالاردىڭ مۇلكىن ەرىكتى تۇردە جاريا ەتۋ جانە راقىمشىلىق جاساۋ تۋرالى» زاڭ جوباسىن پرەزيدەنت اكىمشىلىگى 2022 جىلدىڭ ناۋرىز ايىندا ازىرلەگەن بولاتىن. «ادىلەت» زاڭ كلينيكاسىنىڭ زاڭگەرلەرى جوبانى ساراپتاي كەلە، «شىن مانىندە، جاسالىپ جاتقان ۇسىنىستار جەكە ادامعا قارسى قىلمىستاردىڭ بارلىعىنان، بارلىق تەرىس قىلىقتاردان، بانديتيزمنەن، ادام ساۋداسىنان جانە ەڭبەكتى زاڭسىز پايدالانۋدان پايدا الۋعا ىنتالاندىرادى» دەپ تۇيىندەدى.
زاڭگەرلەر زاڭ جوباسى قىرعىزستان كونستيتۋتسياسىنا، رەسپۋبليكا قاتىسۋشىسى بولىپ تابىلاتىن حالىقارالىق شارتتار مەن قۇجاتتارعا، سونداي-اق سىبايلاس جەمقورلىقپەن كۇرەس جانە ونى جويۋ جونىندەگى مەملەكەتتىك ستراتەگياعا قايشى كەلەتىنىن باسا ايتتى.
جاۋاپ رەتىندە جاپاروۆ بۇل زاڭنىڭ ماقساتى - اۋقاتتى ادامداردىڭ شەتەلدەگى اكتيۆتەرىن، اقشاسىن زاڭداستىرىپ، قىرعىزستان بانكتەرىندە ساقتاۋعا مۇمكىندىك بەرۋ ەكەنىن ايتتى.
«بانكتەر پايدا كورەدى. اۋماعىمىزدا زاۋىتتار مەن فابريكالار سالساق، جۇمىس ورىندارى پايدا بولادى. سالىقتار بىزگە تولەنەدى. زاڭنىڭ بارلىق ماقساتى دا وسى. بۇل بايلاردىڭ اراسىندا مەنىڭ دوستارىم دا، تۋىستارىم دا جوق، مەن ولارعا قولداۋ كورسەتەمىن»، - دەپ سەندىردى قىرعىزستان پرەزيدەنتى.
