ۋكرايناعا جاپپاي باسىپ كىرۋ كەزىندە قازا تاپقان رەسەيلىك 80 973 اسكەري قىزمەتكەردىڭ اتى-ءجونى انىقتالدى. ولاردىڭ جارتىسىنان كوبىسى سوعىس باستالعاندا اسكەرمەن بايلانىسى بولماعان. بۇل تۋرالى اشىق دەرەكتەرگە سۇيەنە وتىرىپ، ۆۆس Mediazona باسىلىمىمەن جانە ەرىكتىلەر توبىمەن بىرگە انىقتادى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
اقپاراتقا سايكەس، ەرىكتىلەر اراسىندا قازا تاپقاندار سانىنىڭ جىلدام ءوسۋى جالعاسىپ جاتىر. ولاردىڭ كوپشىلىگى الدىڭعى شەپكە جىبەرىلگەننەن كەيىن ەكى-ءتورت اپتا ىشىندە قازا تاپقان.
التاي ولكەسىنىڭ زارينسك قالاسىنان 32 جاستاعى نيكيتا سولوۆيوۆ 2024 جىلدىڭ 9 قىركۇيەگىندە ۋكرايناعا اتتانىپ، بەس كۇننەن كەيىن قازا تاپقان.
ايتا كەتسەك، ەرىكتىلەر دەگەنىمىز – تولىقماسشتابتى باسقىنشىلىق باستالعاننان كەيىن عانا كەلىسىمشارتقا قول قويعان ادامدار. ولاردىڭ جالپى قازا تاپقاندار اراسىنداعى ۇلەسى ءوسىپ كەلەدى جانە قازىرگى ۋاقىتتا رەسەي تاراپىنان راستالعان جالپى شىعىنداردىڭ 22%-ىن قۇرايدى.
2023 جىلدىڭ قاراشا ايىندا ەرىكتىلەر تەك 14%-دى عانا قۇراعان بولاتىن.
قاماۋعا الىنىپ، سوعىسقا جىبەرىلگەن تۇتقىنداردىڭ ۇلەسى كەرىسىنشە ازايىپ بارادى. 2023 جىلدىڭ قاراشا ايىندا ولار جالپى شىعىنداردىڭ 26%-ىن قۇراسا، قازىر بۇل كورسەتكىش 18%-عا دەيىن تومەندەگەن. دەگەنمەن، تۇتقىنداردان جاساقتالعان بولىمشەلەر ءالى دە الدىڭعى شەپتە ورنالاسىپ، شايقاستىڭ ءبىر بولىگىن ءوز مويىندارىنا الىپ وتىر.
