Украинаға жаппай басып кіру кезінде қаза тапқан ресейлік 80 973 әскери қызметкердің аты-жөні анықталды. Олардың жартысынан көбісі соғыс басталғанда әскермен байланысы болмаған. Бұл туралы ашық деректерге сүйене отырып, ВВС Mediazona басылымымен және еріктілер тобымен бірге анықтады, деп хабарлайды “Адырна” ұлттық порталы ВВС-ге сілтеп.
Ақпаратқа сәйкес, еріктілер арасында қаза тапқандар санының жылдам өсуі жалғасып жатыр. Олардың көпшілігі алдыңғы шепке жіберілгеннен кейін екі-төрт апта ішінде қаза тапқан.
Алтай өлкесінің Заринск қаласынан 32 жастағы Никита Соловьёв 2024 жылдың 9 қыркүйегінде Украинаға аттанып, бес күннен кейін қаза тапқан.
Айта кетсек, еріктілер дегеніміз – толықмасштабты басқыншылық басталғаннан кейін ғана келісімшартқа қол қойған адамдар. Олардың жалпы қаза тапқандар арасындағы үлесі өсіп келеді және қазіргі уақытта Ресей тарапынан расталған жалпы шығындардың 22%-ын құрайды.
2023 жылдың қараша айында еріктілер тек 14%-ды ғана құраған болатын.
Қамауға алынып, соғысқа жіберілген тұтқындардың үлесі керісінше азайып барады. 2023 жылдың қараша айында олар жалпы шығындардың 26%-ын құраса, қазір бұл көрсеткіш 18%-ға дейін төмендеген. Дегенмен, тұтқындардан жасақталған бөлімшелер әлі де алдыңғы шепте орналасып, шайқастың бір бөлігін өз мойындарына алып отыр.
