ارمەنيا 28 قاراشا كۇنى استانادا وتەتىن ۇقشۇ كەڭەسىنىڭ وتىرىسىنا قاتىسپايدى. بۇل تۋرالى ەلدىڭ سىرتقى ىستەر ءمينيسترى ارارات ميرزويان ايتتى، دەپ حابارلايدى «ادىرنا» ءتىلشىسى.
«ارمەنيا ۇقشۇ سىرتقى ىستەر مينيسترلەرى كەڭەسىنىڭ، قورعانىس مينيسترلەرى كەڭەسىنىڭ جانە قاۋىپسىزدىك كەڭەسى حاتشىلارى كوميتەتىنىڭ وتىرىستارىنا قاتىسپايدى»،—دەدى ول.
بۇعان دەيىن ارمەنيا پرەمەر-ءمينيسترى نيكول پاشينيان ەلدىڭ ۇقشۇ-عا مۇشەلىگىن زاڭدى نەگىزدە توقتاتۋى مۇمكىن ەكەنىن حابارلاعان ەدى.
«ۇقشۇ ارمەنيا الدىنداعى قاۋىپسىزدىك سالاسىنداعى مىندەتتەمەلەرىن ورىنداۋدىڭ ورنىنا، كەرىسىنشە، ارمەنيا رەسپۋبليكاسى ءۇشىن قيىندىقتار تۋعىزىپ وتىر»، – دەپ مالىمدەدى ول.
ايتا كەتەيىك، ۇجىمدىق قاۋىپسىزدىك جونىندەگى شارت ۇيىمى قاۋىپسىزدىك كەڭەسىنىڭ كەزەكتى سەسسياسىنا قازاقستان پرەزيدەنتى قاسىم-جومارت توقاەۆ توراعالىق ەتەدى. جيىندا ايماقتىق جانە حالىقارالىق قاۋىپسىزدىكتىڭ نەگىزگى ماسەلەلەرى تالقىلانباق.
