حالىقارالىق قىلمىستىق سوت نەتانياحۋ، گالانت جانە حاماس جەتەكشىسىنە وردەر بەردى، دەپ حابارلايدى "ادىرنا" ۇلتتىق پورتالى.
حالىقارالىق قىلمىستىق سوت يزرايل پرەمەر-ءمينيسترى بينيامين نەتانياحۋ، بۇرىنعى قورعانىس ءمينيسترى يواۆ گالانت جانە حاماس جەتەكشىلەرىنىڭ ءبىرى مۇحاممەد دەيفكە اسكەري قىلمىستار مەن ادامزاتقا قارسى قىلمىستار جاسادى دەگەن ايىپپەن قاماۋعا الۋ وردەرىن بەردى.
حقس مالىمەتىنشە، يزرايل باسشىلىعى گازا سەكتورىنداعى بەيبىت تۇرعىنداردى ءومىر سۇرۋگە قاجەتتى زاتتاردان ادەيى ايىرىپ، گۋمانيتارلىق كومەككە كەدەرگى كەلتىردى دەپ ايىپتالىپ وتىر. سونىمەن قاتار، سوت گازاداعى بەيبىت تۇرعىندارعا باعىتتالعان اۋە سوققىلارى مەن ادام قۇقىقتارىن بۇزۋ جاعدايلارىن انىقتادى.
مۇحاممەد دەيفكە قاتىستى ايىپتار 2023 جىلى 7 قازاندا يزرايلدەگى بەيبىت تۇرعىندارعا جاسالعان تەرروريستىك شابۋىلدارعا بايلانىستى. حقس مالىمدەمەسىندە بۇل ارەكەتتەر بەيبىت تۇرعىنداردى جاپپاي قىرىپ-جويۋ سيپاتىندا بولعانى ايتىلعان.
يزرايل ۇكىمەتى سوت شەشىمىن "ابسۋردتى" دەپ اتاپ، حقس-تى تەرروريستىك توپتاردى قولدادى دەپ ايىپتادى. ءيزرايلدىڭ وپپوزيتسيالىق ساياساتكەرلەرى دە بۇل شەشىمدى سىناپ، ونى "تەرروريزمدى ماداقتاۋ" دەپ باعالادى.
حقس-تىڭ بۇل قادامى تاياۋ شىعىستاعى شيەلەنىستىڭ ودان ءارى ۋشىعۋىنا ىقپال ەتۋى مۇمكىن دەگەن الاڭداۋشىلىق بار. 2023 جىلدىڭ قازانىنان بەرى يزرايل مەن حاماس اراسىنداعى قاقتىعىس كەزىندە مىڭداعان ادام قازا تاپتى.
ايتا كەتەيىك، "ۋكرايناعا قارسى سوعىس اشىپ، باسقىنشى اسكەرلەرىنىڭ قولىمەن ۋكراين حالقىن قۇرتىپ جاتقان رەسەي پرەزيدەنتى ۆلاديمير پۋتين - اسكەري قىلمىسكەر" دەپ ايىپتالعان ەدى. حالىقارالىق قىلمىستىق سوت (حقك) رەسەيدىڭ باسشىسىن قاماۋعا الۋعا وردەر بەرگەن.
