گازا سەكتورىن باقىلايتىن حاماس توبى 7 قازان تاڭەرتەڭنەن بەرى ءيزرايلدى جاپپاي اتقىلاپ جاتىر. كەمىندە 15 ادام جاراقات العان، ءبىر ايەل وپات بولعان. ميلليونداعان ادامعا بومبادان قورعايتىن ورىنداردان كەتپەۋگە كەڭەس بەرىلگەن. حاماس مۇشەلەرى شەكاراداعى يزرايل قالالارىنا كىرگەن. يزرايل قورعانىس ارمياسى كەيىنگى 50 جىلدا العاش رەت سوعىس جاعدايىن جاريالادى، دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
حاماس جەتەكشىسىنىڭ سوزىنشە، يزرايل اۋماعىنا 5 مىڭنان استام راكەتا جىبەرىلگەن. ناتيجەسىندە ءيزرايلدىڭ گدەروت قالاسىنا راكەتا ءتۇسىپ، 60 جاستاعى ايەل قازا بولعان. جاراقات العان 15 ادامنىڭ ەكەۋى اۋىر جاراقات العان.
كۋسەيف ەلدى مەكەنىنىڭ بيلىگى اتقىلاۋدىڭ سالدارىنان ءتورت ادام مەرت بولعانىن، بىرنەشە ادام جارالانعانىن ايتتى.
ءيزرايلدىڭ كوپتەگەن قالاسىندا دابىل ىسكە قوسىلعان، تەل-اۆيۆتەگى عيماراتتارعا راكەتا تۇسكەنى حابارلاندى.
يزرايل ارمياسى گازامەن شەكاراداعى سدەروتقا حاماس مۇشەلەرى كىرگەنىن حابارلادى. الەۋمەتتىك جەلىدە جاريالانعان ۆيدەولارعا قاراعاندا، قالادا اتىس ءجۇرىپ جاتىر. كەي مالىمەت بويىنشا، 7 ادام قازا بولعان: ولاردى اۆتوبۋس ايالداماسىندا اتىپ كەتكەن.
حاماس توبى يزرايلگە قارسى جاڭا وپەراتسيا باستاعانىن جاريالادى. توپ وكىلدەرى وعان «ءيزرايلدىڭ يەرۋساليمدەگى ءال-اقسا مەشىتىن قورلاۋى» تۇرتكى بولعان.
يزرايل ارمياسى «سوعىسقا دايىندىق جاعدايىن» جاريالادى. يزرايل قورعانىس ءمينيسترى يواۆ گاللانت زاپاستاعى قىزمەتكەرلەردى ارمياعا شاقىرۋدى قولداپ، گازا سەكتورىنان 80 شاقىرىم اۋماقتا توتەنشە جاعداي جاريالادى. وعان تەل-اۆيۆ تا كىرەدى.
«ادىرنا» ۇلتتىق پورتالى
