«قازاتومونەركاسىپ» ۇلتتىق اتوم كومپانياسى بۋدەنوۆسكوە كەن ورنىنىڭ «سولتۇستىك» ۋچاسكەسىندە 6 جىل ۋران بارلاۋ قۇقىعىن الدى. كومپانيا جەر قويناۋىن پايدالانۋ قۇقىعىن تاعى 5 جىلعا ۇزارتا الادى. بۇل تۋرالى بۇگىن، 18 قاراشادا ۇلتتىق وپەراتوردىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«سولتۇستىك» ۋچاسكەسى ۋراننىڭ ءىرى كەن شوعىرىنىڭ بولۋىنا بايلانىستى ايتارلىقتاي الەۋەتكە يە. ونىڭ قولايلى گەولوگيالىق جاعدايلارى جانە جۇمىس ىستەپ تۇرعان كەن ورىندارىنا جاقىندىعى تابىستى جانە ۇزاق ۋاقىت يگەرۋ ءۇشىن بىرەگەي مۇمكىندىكتەر تۋعىزادى. بۇل جوبا قازاقستاننىڭ ۋران ءوندىرۋ سالاسىن دامىتۋداعى ماڭىزدى كەزەڭ بولاتىنىنا جانە ءبىزدىڭ كومپانيانىڭ ۇزاق مەرزىمدى قۇندىلىعىن قۇرۋعا ەلەۋلى ۇلەس قوساتىنىنا سەنىمدىمىز»، - دەپ اتاپ ءوتتى باسقارما توراعاسى مەيىرجان يۋسۋپوۆ.
الدىن الا باعالاۋ بويىنشا ر1 جانە ر2 ساناتتارى بويىنشا ۋچاسكەدەگى ۋران رەسۋرسى 100 مىڭ توننادان اسادى. بولاشاقتا رەسۋرستاردى ناقتىلاۋ جانە ولاردى جوعارى ساناتتارعا (س1 جانە س2) اۋىستىرۋ جوسپارلانعان. بۇل ۋچاسكەنىڭ الەۋەتىن بارىنشا ءتيىمدى پايدالانۋعا جانە كومپانيانىڭ ۇزاق مەرزىمدى ستراتەگيالىق جوسپارلارىن ىسكە اسىرۋعا مۇمكىندىك بەرەدى.
ەسكە سالايىق، بىلتىر «ورتالىق ازيا ەلەكتر ەنەرگەتيكالىق كورپوراتسياسى» اق بۇرىنعى باسشىسى، بەلگىلى كاسىپكەر ەركىن ءامىرحانوۆ «بۋدەنوۆسكوە» كەنىشى كەزىندە قازاقستاندىق وليگارح الەكساندر كلەبانوۆ پەن ونىڭ ىسكەر سەرىكتەسى، حورۆات-رەسەيلىك كاسىپكەر ۆاسيلي انيسيموۆقا تەگىن ءوتىپ كەتكەنىن ايتقان ەدى.
