16 قاراشا كۇنى وسكەمەن قالاسىندا جىلۋمەن جابدىقتاۋ قۇبىرىنىڭ جارىلۋى سالدارىنان 15 مىڭعا جۋىق تۇتىنۋشى بىرنەشە ساعات بويى جىلۋ مەن ىستىق سۋسىز قالدى، دەپ حابارلايدى "ادىرنا" ۇلتتىق پورتالى.
«شىعىس جىلۋ» كاسىپورنىنىڭ مالىمەتىنشە، 14 819 ابونەنت زارداپ شەككەن. ونىڭ 14 457-ءسى – جەكە تۇلعالار، ال 362-ءسى – زاڭدى تۇلعالار.
العاشىندا جوندەۋ جۇمىستارى ساعات 19:00-دە اياقتالادى دەپ جوسپارلانعان.
«قۇبىرداعى اقاۋدى جويۋ ءۇشىن جىلۋ ماگيسترالى 13:00-دەن 19:00-گە دەيىن اجىراتىلدى. الدىن الا بولجام بويىنشا، اقاۋ №2 قازاندىقتاعى كەرنەۋدىڭ تومەندەۋىنەن تۋىنداعان. اجىراتۋ كەزىندە تۇتىنۋشىلاردىڭ ءۇي ىشىندەگى تەمپەراتۋرالىق نورماتيۆتەرى بۇزىلمايدى»، – دەدى لەۆوبەرەجە جىلۋ جەلىلەرىنىڭ باسشىسى ولەگ بوندار.
الايدا، ساعات 19:00-دە تۇتىنۋشىلاردىڭ پاتەرلەرىنە جىلۋ بەرىلمەدى.
«سىرتقى اۋا تەمپەراتۋراسى 0 گرادۋس، تۇرعىندار تاراپىنان شاعىمدار تۇسكەن جوق. «شىعىس جىلۋ» كومپانياسىنىڭ اقپاراتى بويىنشا، جوندەۋ جۇمىستارىن ساعات 23:00-گە دەيىن اياقتاۋ جوسپارلانعان. بارلىعى 8 تەحنيكا جانە 24 ادام جۇمىلدىرىلدى»، – دەپ حابارلادى كاسىپورىننىڭ ءباسپاسوز قىزمەتى.
پاتەرلەر ساعات 23:00-گە قاراي سالقىنداپ كەتكەن. تەك ءتۇن ورتاسىنا قاراي اپاتتىق بريگادالار جارىلعان جەردى انىقتاپ، قالپىنا كەلتىرۋ جۇمىستارىن باستاعان. جوندەۋگە «شىعىس جىلۋ» ماماندارى، سونداي-اق وبلىستىق جانە قالالىق اكىمدىك وكىلدەرى تارتىلعان.
اپاتتىڭ سەبەپتەرىن انىقتاۋ ءۇشىن ارنايى كوميسسيا قۇرىلعانى بەلگىلى بولدى.
«ماماندار مەن تەحنيكا جۇمىس ىستەۋدە، جارىلعان جەردى انىقتاۋدا قيىندىقتار تۋىندادى. اپات جويىلعاننان كەيىن جىلۋ بەرىلەدى. اپات كەزىندە جىلۋ جۇيەسى قاتىپ قالعان جوق. تۇرعىنداردىڭ تۇسىنىستىك تانىتقانى ءۇشىن العىسىمىزدى بىلدىرەمىز جانە سابىر ساقتاۋدى سۇرايمىز. جاعداي جەرگىلىكتى اتقارۋشى ورگانداردىڭ باقىلاۋىندا»، – دەپ اتاپ ءوتتى شىعىس قازاقستان وبلىسى اكىمىنىڭ ورىنباسارى باقىتجان باياحمەتوۆ.
