كاسپي قۇبىر كونسورتسيۋمىنا (كقك) جاسالعان شابۋىلداردىڭ سالدارىنان قازاقستاندا بيىل مۇناي ءوندىرۋ جوسپارى 98 ملن توننادان 96 ملن تونناعا دەيىن قىسقارتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى بريفينگتە ەنەرگەتيكا ءمينيسترى ەرلان اقكەنجەنوۆ مالىمدەدى. ءمينيستردىڭ ايتۋىنشا، قاڭتاردا، ماۋسىم-شىلدە ايلارىندا بولعان شابۋىلداردىڭ سالدارىنان قازاقستان شامامەن 3,5 ملن توننا مۇناي ءوندىرۋ مۇمكىندىگىنەن ايىرىلعان.
«وسىدان كەيىن تشو اكتسيونەرلەرى كۇردەلى جوندەۋ جۇمىستارىن جۇرگىزبەۋ تۋرالى شەشىم قابىلدادى. جوندەۋ جۇمىستارى كەلەسى جىلعا اۋىستىرىلدى»، – دەدى ەرلان اقكەنجەنوۆ.
سونىمەن قاتار كەلەسى جىلى NCOC وپەراتورىنىڭ كەن ورىندارىندا دا كۇردەلى جوندەۋ جۇمىستارىن جۇرگىزۋ جوسپارلانىپ وتىر.
«بيىل 98 ملن توننا مۇناي ءوندىرۋدى جوسپارلاعان ەدىك. قازىر بۇل كورسەتكىش 96 ملن تونناعا تۇزەتىلدى. كقك-عا جاسالعان شابۋىلدار سالدارىنان وندىرىلمەگەن مۇناي كولەمى 3,5 ملن توننانى قۇرايدى»، – دەدى مينيستر.
بۇعان دەيىن 30 شىلدەدە كاسپي قۇبىر كونسورتسيۋمى ەكى تانكەرگە تاعى دا شابۋىل جاسالعان. شابۋىل سالدارىنان مۇناي تيەۋ جۇمىستارى ۋاقىتشا توقتاتىلدى.
