25 تامىزدا امەريكالىق كانتري مۋزىكاسىنىڭ اڭىزى دوللي پارتون 80 جاسىندا ومىردەن وزدى. قارالى حاباردى ونىڭ وتباسى جەتكىزدى، دەپ حابارلايدى «ادىرنا» ءتىلشىسى.
جيەنى برايان سيۆەردىڭ ايتۋىنشا، پارتون «قوعامنىڭ سان الۋان توپتارىنان شىققان انشىلەرگە، ءان اۆتورلارىنا، مۋزىكانتتار مەن ارمانشىلدارعا ەسىك اشقان».
«الەمگە ايگىلى جۇلدىز ءارى قوعام قايراتكەرى، بارشاعا سۇيىكتى ءانشى، ءان اۆتورى، فيلانتروپ، اكتريسا، دراماتۋرگ جانە جازۋشى دوللي پارتون تەننەسسي شتاتىنىڭ نەشۆيلل قالاسىندا ومىردەن وزدى»، – دەلىنگەن ءانشىنىڭ ءباسپاسوز قىزمەتىنىڭ حابارلاماسىندا.
پارتوننىڭ قايتىس بولعانىنا اقش پرەزيدەنتى دونالد ترامپ تا پىكىر ءبىلدىرىپ، ونى كانتري مۋزىكاسى تاريحىنداعى ەڭ ۇلى ورىنداۋشىلاردىڭ ءبىرى دەپ اتادى.
«بۇل – ميلليونداعان ادام ءۇشىن ورنى تولماس قازا. ونىڭ ورنىن ەشكىم جانە ەشقاشان باسا المايدى. وعان دەگەن قۇرمەت بەلگىسى رەتىندە 25 تامىزدان باستاپ ءبىر اپتا بويى بۇكىل امەريكا قۇراما شتاتتارىندا مەملەكەتتىك تۋلاردى تومەن ءتۇسىرۋدى تاپسىردىم. جانىڭ ءجانناتتا بولسىن، دوللي! بۇكىل الەم سەنى جاقسى كورەدى»، – دەپ جازدى ول Truth Social جەلىسىندە.
دوللي پارتون شىعارماشىلىق جولىن 1950-جىلداردىڭ ورتاسىندا باستاپ، 1967 جىلى «Dumb Blonde» ءانى ارقىلى كوپشىلىككە تانىلعان. ال 1973 جىلى جارىق كورگەن «Jolene» كومپوزيتسياسى Rolling Stone جۋرنالىنىڭ كانتري جانرىنداعى 100 ۇزدىك ءان جانە بارلىق ۋاقىتتاعى 500 ۇزدىك ءان تىزىمىنە ەنگەن.
