16 qarasha kúni Óskemen qalasynda jylýmen jabdyqtaý qubyrynyń jarylýy saldarynan 15 myńǵa jýyq tutynýshy birneshe saǵat boıy jylý men ystyq sýsyz qaldy, dep habarlaıdy "Adyrna" ulttyq portaly.
«Shyǵys jylý» kásipornynyń málimetinshe, 14 819 abonent zardap shekken. Onyń 14 457-si – jeke tulǵalar, al 362-si – zańdy tulǵalar.
Alǵashynda jóndeý jumystary saǵat 19:00-de aıaqtalady dep josparlanǵan.
«Qubyrdaǵy aqaýdy joıý úshin jylý magıstrali 13:00-den 19:00-ge deıin ajyratyldy. Aldyn ala boljam boıynsha, aqaý №2 qazandyqtaǵy kerneýdiń tómendeýinen týyndaǵan. Ajyratý kezinde tutynýshylardyń úı ishindegi temperatýralyq normatıvteri buzylmaıdy», – dedi Levobereje jylý jelileriniń basshysy Oleg Bondar.
Alaıda, saǵat 19:00-de tutynýshylardyń páterlerine jylý berilmedi.
«Syrtqy aýa temperatýrasy 0 gradýs, turǵyndar tarapynan shaǵymdar túsken joq. «Shyǵys jylý» kompanııasynyń aqparaty boıynsha, jóndeý jumystaryn saǵat 23:00-ge deıin aıaqtaý josparlanǵan. Barlyǵy 8 tehnıka jáne 24 adam jumyldyryldy», – dep habarlady kásiporynnyń baspasóz qyzmeti.
Páterler saǵat 23:00-ge qaraı salqyndap ketken. Tek tún ortasyna qaraı apattyq brıgadalar jarylǵan jerdi anyqtap, qalpyna keltirý jumystaryn bastaǵan. Jóndeýge «Shyǵys jylý» mamandary, sondaı-aq oblystyq jáne qalalyq ákimdik ókilderi tartylǵan.
Apattyń sebepterin anyqtaý úshin arnaıy komıssııa qurylǵany belgili boldy.
«Mamandar men tehnıka jumys isteýde, jarylǵan jerdi anyqtaýda qıyndyqtar týyndady. Apat joıylǵannan keıin jylý beriledi. Apat kezinde jylý júıesi qatyp qalǵan joq. Turǵyndardyń túsinistik tanytqany úshin alǵysymyzdy bildiremiz jáne sabyr saqtaýdy suraımyz. Jaǵdaı jergilikti atqarýshy organdardyń baqylaýynda», – dep atap ótti Shyǵys Qazaqstan oblysy ákiminiń orynbasary Baqytjan Baıahmetov.
