"موسفيلم" كينوستۋدياسىنىڭ باس ديرەكتورى كارەن شاحنازاروۆتىڭ ايتۋىنشا، كينوستۋديا وزدەرىنىڭ رەكۆيزيتتىك اسكەري تەحنيكاسىن رەسەي قارۋلى كۇشتەرىنە بەردى، دەپ حابارلايدى "ادىرنا" ۇلتتىق پورتالى dw.com-گە سىلتەپ.
بۇل تۋرالى رەسەي پرەزيدەنتى ۆلاديمير پۋتينگە "موسفيلم" كينوستۋدياسىنىڭ باس ديرەكتورى جانە باسقارما توراعاسى كارەن شاحنازاروۆ ايتتى.
كرەملدىڭ ءباسپاسوز قىزمەتى 13 قاراشا كۇنى قارۋلى كۇشتەرگە 28 ت-55 تانكى، سەگىز پت-76 تانكى، التى بمپ جانە سەگىز تارتقىش تەحنيكا بەرىلگەنى تۋرالى اقپارات جاريالاعان. ولار "اسكەري-تەحنيكالىق بازادا" ساقتالعان.
"مەن قاجەتتىلىكتەر بار ەكەنىن ءبىلدىم، قورعانىس مينيسترلىگىمەن بايلانىسىپ، سول تەحنيكالاردى الىپ كەتتى", — دەدى رەجيسسەر اڭگىمە بارىسىندا.
ال كينوستۋديانىڭ سايتىندا:
"موسفيلم" سايتىندا "اسكەري تەحنيكا" بولىمىندە كينوستۋديانىڭ وندىرىستىك كەشەنى تانك، ارتيللەريا، اۆتوموبيل جانە اتىس قارۋىمەن جابدىقتالعانى كورسەتىلگەن. وندا 190-نان استام بروندى تەحنيكا، برونەترانسپورتەرلەر جانە وزدىگىنەن جۇرەتىن قوندىرعىلار بار، ولار ءارتۇرلى كەزەڭدەردىڭ شەتەلدىك اسكەري تەحنيكاسىنا ۇقساس ەتىپ جاسالعان. "بارلىق تەحنيكا رەكۆيزيت (ساحنالىق قۇرال) رەتىندە قولدانىلادى، جۇمىس جاعدايىندا", — دەلىنگەن رەسەيلىك كينوستۋديانىڭ سايتىندا.
رەسەي اسكەرىنىڭ ۋكرايناعا كەڭ اۋقىمدى باسىپ كىرۋى باستالعاننان باستاپ، رەسەيدە قارۋ-جاراق جەتىسپەۋشىلىگى تۋرالى حابارلار شىعا باستادى. وسىعان بايلانىستى رەسەي قورعانىس مينيسترلىگى ەسكى قورلاردى قايتا جانداندىرۋعا شەشىم قابىلدادى. اتاپ ايتقاندا، 1958-1979 جىلدارى شىعارىلعان ت-55 تانكى دە مايدانعا جىبەرىلدى، ونى شاحنازاروۆ پۋتينمەن اڭگىمەدە اتاپ ءوتتى.
