وزبەكستان سىرتقى ىستەر ءمينيسترىنىڭ ورىنباسارى وليمجون ابدۋللاەۆ رەسپۋبليكاداعى رەسەي فەدەراتسياسىنىڭ ەلشىسى الەكسەي ەرحوۆپەن ەڭبەك كوشى-قونى ماسەلەلەرىن تالقىلادى، دەپ حابارلايدى «ادىرنا» ءتىلشىسى.
«كەزدەسۋ بارىسىندا ەڭبەك كوشى-قونىن جەتىلدىرۋ جانە كوشى-قون پروتسەستەرىن ودان ءارى رەتتەۋ ماسەلەلەرى قارالدى»، — دەپ جازدى وزبەكستان ءسىم.
26 قاڭتاردا وتكەن كەزدەسۋدە رەسەي اۋماعىندا ەڭبەك ەتىپ جۇرگەن وزبەكستان ازاماتتارىنىڭ قۇقىقتارى مەن زاڭدى مۇددەلەرىن قورعاۋعا ەرەكشە نازار اۋدارىلعان. اتاپ ايتقاندا، تاشكەنت رەسپۋبليكا ازاماتتارىنىڭ، سونىڭ ىشىندە كوشى-قون زاڭناماسىن بۇزعان تۇلعالاردىڭ دا قۇقىقتارى مەن ادامي قادىر-قاسيەتىنىڭ كەز كەلگەن تۇردە شەكتەلۋىنە جول بەرىلمەيتىنىن، ونىڭ ىشىندە كوشى-قون تەكسەرىستەرى مەن رەيدتەر بارىسىندا دا، ەرەكشە اتاپ ءوتتى.
«كەزدەسۋ تاراپتاردىڭ وزبەكستان رەسپۋبليكاسى ازاماتتارىنىڭ رەسەي فەدەراتسياسىندا زاڭدى تۇردە ەڭبەك ەتۋىنە قولايلى جاعداي جاساۋعا جانە كوشى-قون پروتسەستەرىن رەتتەۋگە باعىتتالعان پراگماتيكالىق ءارى ءوزارا قۇرمەتكە نەگىزدەلگەن ديالوگتى دامىتۋعا نيەتتى ەكەنىن راستادى»، — دەلىنگەن حابارلامادا.
وزبەك ميگرانتتارىنىڭ قۇقىقتارىن قورعاۋ ماسەلەسى رەسەيدەگى بىرقاتار وقيعالاردان كەيىن ەرەكشە وزەكتەنە ءتۇستى. اتاپ ايتقاندا، 2025 جىلعى ماۋسىمدا وزبەك بيلىگى ماسكەۋدىڭ سوكولنيكي اۋدانىندا كۇشتىك قۇرىلىمدار جۇرگىزگەن رەيدتەن كەيىن الاڭداۋشىلىق بىلدىرگەن. باق پەن كۋاگەرلەردىڭ مالىمەتىنشە، رەيد كەزىندە ميگرانتتارعا فيزيكالىق كۇش قولدانىلعان. ولاردىڭ قۇجاتتارىن تەكسەرۋ بارىسىندا بارلىعىن بولمەلەردەن شىعارىپ، باياۋ قيمىلداعانداردى تەپكىلەپ، بالاعاتتاعان. ناتيجەسىندە 5–6 ادام ۇستالىپ، كوشى-قون رەجيمىن بۇزعانى ءۇشىن رەسەيدەن دەپورتاتسيالانعان.
ورتالىق ازيا ەلدەرىنەن كەلگەن ميگرانتتاردىڭ رەسەيدەگى جاعدايى 2024 جىلعى ناۋرىزدا «كروكۋس سيتي حولل» كونتسەرت زالىندا بولعان تەررورلىق اكتىدەن كەيىن ايتارلىقتاي ناشارلادى. اتالعان شابۋىل سالدارىنان 140-تان استام ادام قازا تاپتى، ال كۇدىكتىلەر تاجىكستان ازاماتتارى بولىپ شىقتى. وسىدان كەيىن جاتاقحانالاردا، حوستەلدەردە جانە شەتەلدىكتەر كوپ جينالاتىن ورىنداردا رەيدتەر جيىلەپ، دەپورتاتسيالانعاندار سانى كۇرت ءوستى.
2024 جىلدىڭ جازىندا رەسەي دەپۋتاتتارى كوشى-قون زاڭناماسىنا بىرقاتار ءىرى وزگەرىستەر ەنگىزدى. پوليتسيانىڭ شەتەل ازاماتتارىن باقىلاۋ وكىلەتتىكتەرى كەڭەيتىلدى. قۇقىق قورعاۋ ورگاندارى ەندى سوت شەشىمىنسىز ميگرانتتاردى 48 ساعاتقا دەيىن ۇستاۋعا جانە دەپورتاتسيالاۋ تۋرالى شەشىم شىعارۋعا قۇقىلى.
