ۋكرايناداعى رەسەي كۇشتەرىنىڭ جاڭا قولباسشىسى تاعايىندالدى. بۇل رەسەيلىك گەنەرال سيرياداعى جانە باسقا دا سوعىس ايماقتارىنداعى بەيبىت تۇرعىندارعا قاتىگەزدىگىمەن تانىمال، دەيدى اقش-تىڭ رەسمي دەرەككوزدەرى.
اقش شەنەۋنىكتەرى جەكسەنبى كۇنى رەسەيدىڭ ەڭ تاجىريبەلى گەنەرالدارىنىڭ ءبىرى، 60 جاستاعى گەنەرال الەكساندر دۆورنيكوۆتىڭ ۋكرايناداعى رەسەي اسكەري توبىنىڭ جاڭا قولباسشىسى بولىپ تاعايىندالعانىن حابارلادى.
2015 جىلى دۆورنيكوۆ سيرياعا پرەزيدەنت باشار ءال-اسادتى قولداۋ ءۇشىن بارىپ، وندا ءبىر جىل رەسەيلىك توپتى باسقاردى. وعان سيرياداعى وپەراتسيالارى ءۇشىن رەسەي فەدەراتسياسىنىڭ باتىرى اتاعى بەرىلدى جانە قازىر رەسەي فەدەراتسياسىنىڭ وڭتۇستىك اسكەري وكرۋگىنىڭ قولباسشىسى.
سيرياداعى ونىڭ قولباسشىلىعىنداعى كۇشتەر بىرنەشە رەت ازاماتتىق اۋداندار مەن اۋرۋحانالاردى بومبالادى دەپ ايىپتالعان. ۇلىبريتانيادا ورنالاسقان سيريالىق ادام قۇقىقتارى ۇيىمىنىڭ باسشىسى رامي ابدۋلراحمان نيۋ-يورك تايمس گازەتىنە: «سيرياداعى بەيبىت تۇرعىنداردى ولتىرگەنى ءۇشىن جاۋاپ بەرەتىن جالعىز ادام باشار اساد ەمەس، رەسەيلىك گەنەرال دا. ول اسكەري قيمىلداردىڭ قولباسشىسى بولدى: بۇل سيريالىق بەيبىت تۇرعىنداردى ءولتىرۋدىڭ ارتىندا ونىڭ تۇرعانىن بىلدىرەدى، مۇنىڭ بارىنە بۇيرىق بەرگەن سول» دەگەن بولاتىن.
اق ءۇيدىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆان CNN تەلەارناسىنا ۋكرايناداعى «دۆورنيكوۆتان بۇدان دا كوپ نارسەنى كۇتۋگە بولادى» دەدى. سونىمەن بىرگە سالليۆان «قانداي بولماسىن باسقا گەنەرالدى تاعايىنداۋ رەسەيدىڭ ۋكراينادا ستراتەگيالىق ساتسىزدىككە ۇشىراپ تۇرعانىن جوققا شىعارا المايدى»، گەنەرالدىققا كىم كەلسە دە ەلدى تەز ارادا باسىپ الىپ، پرەزيدەنت ۆلاديمير زەلەنسكيدىڭ ۇكىمەتىن قۇلاتا المايتىنىن ايتتى.
«بۇل گەنەرال ۋكراينالىق بەيبىت تۇرعىندارعا قارسى قىلمىس پەن قاتىگەزدىكتىڭ تاعى ءبىر كوزى بولادى»، - دەدى سالليۆان. «ال امەريكا قۇراما شتاتتارى، مەن بۇرىن ايتقانىمداي، ول (دۆورنيكوۆ) باسقاراتىن كۇشتەرگە تويتارىس بەرىپ جاتقان ۋكرايندارعا قولداۋ كورسەتۋ ءۇشىن قولدان كەلگەننىڭ ءبارىن جاساۋعا بەل بايلادى».
"ادىرنا" ۇلتتىق پورتالى
