استانا قالاسىندا مەملەكەتتىك كىرىستەر دەپارتامەنتىنىڭ قىزمەتكەرىنە قاتىستى سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
قالالىق سوتتىڭ شەشىمى بويىنشا، جاناما سالىقتاردى اكىمشىلەندىرۋ باسقارماسى ءبولىمىنىڭ باسشىسى ر. تولەگەنوۆ پارا العانى ءۇشىن كىنالى دەپ تانىلىپ، 3 جىل 6 ايعا باس بوستاندىعىنان ايىرىلدى. سونىمەن قاتار، وعان مەملەكەتتىك قىزمەتتە بەلگىلى ءبىر لاۋازىمداردى اتقارۋعا ءومىر بويى تىيىم سالىندى.
سوت انىقتاعانداي، تولەگەنوۆ جەكە كومپانيا ديرەكتورىنان قوسىمشا قۇن سالىعىنىڭ (ققس) ارتىق تولەنگەن سوماسىن قايتارۋ ءۇشىن 3,6 ميلليون تەڭگە كولەمىندە پارا العان. بۇل سوما قايتارىلۋعا ءتيىستى 36 ميلليون تەڭگەنىڭ 10 پايىزىن قۇراعان. تەرگەۋ بارىسىندا انتيكور قىزمەتكەرلەرى ونىڭ ءۇيىن ءتىنتۋ كەزىندە 129 ميلليون تەڭگە كولەمىندە قولما-قول اقشانى تاركىلەگەن.
تولەگەنوۆتىڭ ادۆوكاتتارى سوتقا شاعىم ءتۇسىرىپ، جازانى جەڭىلدەتىپ، ايىپپۇلمەن الماستىرۋدى سۇراعان. الايدا اپەللياتسيالىق سوت ءبىرىنشى ينستانتسيانىڭ ۇكىمىن وزگەرىسسىز قالدىردى. سوت قىزمەتكەردىڭ جاساعان ارەكەتى سالىق ورگاندارىنىڭ بەدەلىنە نۇقسان كەلتىرىپ، مەملەكەتتىك قىزمەتكە دەگەن سەنىمدى السىرەتكەنىن اتاپ ءوتتى.
بۇل ءىس مەملەكەتتىڭ سىبايلاس جەمقورلىققا قارسى كۇرەستەگى قاتاڭ ۇستانىمىن تاعى دا كورسەتتى جانە مەملەكەتتىك قىزمەتكەرلەرگە جاۋاپكەرشىلىك جۇكتەلەتىنىن ەسكەرتتى.
