سەنات بىردەي لاۋازىمداعى قىزمەتكەرلەرگە تەڭ جالاقى تولەۋ جانە اكەلەرگە بەرىلەتىن دەكرەتتىك تولەمدەر ءتارتىبىن ناقتىلايتىن زاڭ جوباسىن ەكى وقىلىمدا قاراپ، ماقۇلدادى، دەپ حابارلايدى "ادىرنا".
قۇجاتقا سايكەس، ەندى زەينەتاقى تاعايىنداۋ كەزىندە جۇمىس ىستەمەيتىن اكەنىڭ بالا كۇتىمىمەن وتكىزگەن ۋاقىتى ەڭبەك وتىلىنە ەنگىزىلەدى. سونىمەن قاتار ءبىر قىزمەتتەگى قىزمەتكەرلەر اراسىنداعى جالاقى ايىرماشىلىعىنا شەكتەۋ قويىلادى.
زاڭ دەپۋتاتتاردىڭ باستاماسىمەن ازىرلەنگەن. جاڭا وزگەرىستەر اكەلەردىڭ دە بالا كۇتىمىنە بەلسەندى قاتىسۋىنا جول اشادى. بالا كۇتىمىمەن وتىرعان ۋاقىت ەڭبەك وتىلىنە قوسىلىپ، بولاشاق زەينەتاقىعا اسەر ەتەدى.
«وسى ورايدا زاڭ قولدانىستاعى ەڭبەك كودەكسىنە، الەۋمەتتىك كودەكسكە، حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكسكە، قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى، رۇقساتتار جانە حابارلامالار تۋرالى، سونداي-اق مەملەكەتتىك ساتىپ الۋ تۋرالى قازاقستان رەسپۋبليكاسىنىڭ زاڭدارىنا وزگەرىستەر مەن تولىقتىرۋلار ەنگىزۋدى كوزدەيدى»، – دەدى سەناتور رۋسلان رۇستەموۆ.
زاڭ اياسىندا جۇمىس بەرۋشىلەرگە ەڭبەك فۋنكتسياسىن اتقاراتىن ادامدارمەن ازاماتتىق-قۇقىقتىق شارت جاساسۋعا تىيىم سالىنادى. سونىمەن قاتار ۇجىمدىق شارتتا جالاقى ايىرماشىلىعىنىڭ شەگى، ەڭبەك قاۋىپسىزدىگى، وندىرىستەگى جازاتايىم وقيعالارعا قاتىستى تولەمدەر سياقتى تالاپتار ناقتىلانادى.
سونداي-اق ەرەۋىل وتكىزۋ تارتىبى دە رەتتەلەدى. اتاپ ايتقاندا، تاتۋلاستىرۋ كوميسسياسىنىڭ جۇمىسىنا دەلدال تارتۋ، قاۋىپتى ءوندىرىس ورىندارىندا مىندەتتى قىزمەت كولەمىن ساقتاۋ جانە ەرەۋىل كەزىندە توقتاتىلمايتىن وندىرىستەر ءتىزىمىن ناقتىلاۋ كوزدەلگەن.
