باتىس قازاقستان وبلىسىنىڭ اكىمى ناريمان تورەعاليەۆ استانادا وتكەن ءباسپاسوز ءماسليحاتىندا باق وكىلدەرىنىڭ كيىك ەتىنە قاتىستى سۇراعىنا جاۋاپ بەردى، دەپ حابارلايدى “ادىرنا” ۇلتتىق پورتالى.
ءوڭىر باسشىسىنا «كيىك ەتىن جەرگىلىكتى ەت كومبيناتتارى وڭدەپ جاتىر ما، الدە ول رەسەيگە ساتىلىپ جاتىر ما؟» دەگەن ساۋال قويىلدى.
«وزدەرىڭىز بىلەسىزدەر، كيىك سانىن رەتتەۋدى قازىر توقتاتتىق، ياعني، ولاردى اتىپ نەمەسە قولمەن اۋلاپ، ۇستاۋعا دا بولمايدى. سوندىقتان ولاردىڭ ەتىنەن كونسەرۆى دايىنداۋ نەمەسە ەتىن ساتۋ جونىندە اقپارات جوق", - دەدى اكىم. ناريمان تورەعاليەۆتىڭ ايتۋىنشا، بۇگىنگى تاڭدا وبلىس باسشىلىعى رەسەي فەدەراتسياسىنىڭ جاۋاپتى ورگاندارىمەن ءوزارا كيىكتەردىڭ بۇرىننان قالىپتاسقان ميگراتسيا جولدارىن اشۋ جونىندە كەلىسىمگە كەلدى.
«اقبوكەندەردىڭ جايىلىپ جۇرگەن ەلدى مەكەندەرى اراسىندا بۇرىننان قالىپتاسقان جولدارى وڭتۇستىك اۋدانداردا ەكەنىن ايتتىم. ولار رەسەيدىڭ شەكاراسىنا وتەدى نەمەسە قازاقستان شەكاراسىنا كىرەدى. وسىعان بايلانىستى ەكىجاقتى شەكارا ارقىلى جولدارىن اشۋ جونىندە ەكى مەملەكەت كەلىسىمگە كەلدى. ءبىزدىڭ ەكولوگيا مينيسترلىگى مەن رەسەي فەدەراتسياسىنىڭ وسىعان جاۋاپتى مينيسترلىكتەرى جۇمىس ىستەپ جاتىر. ازىرگە كيىك ەتىن ساتىپ تا جاتقان جوق، ەشقانداي كونسەرۆ تە جاساپ جاتقان جوق»، - دەيدى ول.
