رەسەيگە جۇمىس ىستەۋگە بارىپ، كەيىن ۋكرايناداعى سوعىسقا تاپ بولعان قازاقستاندىقتار مايدان ايماعىنان شىعارىلدى، دەپ حابارلايدى “ادىرنا” ءتىلشىسى.
زاڭگەر مەيىرمان شەكەەۆ جەلىدەگى پاراقشاسىندا سوعىس شەبىنەن شىعارىلعان قازاق بالالارىنىڭ سانى 11-گە جەتكەنىن ايتتى.
باستاپقىدا زاڭگەر الەۋمەتتىك جەلىدەگى پاراقشاسىندا سوعىس ايماعىنان شىعارىلىپ، ۆورونەج قالاسىنا جەتكىزىلگەن جەتى قازاقستاندىق تۋرالى حابارلاعان. كەيىن جازبادا 11 ادامنىڭ شىعارىلعانىن جازدى.
ازاماتتاردىڭ قازاقستانعا قاشان ورالاتىنى ازىرگە بەلگىسىز. زاڭگەردىڭ ايتۋىنشا، قازاقستان ديپلوماتتارى رەسەي تاراپىمەن كەلىسسوز جۇرگىزىپ جاتىر. شەكەەۆ تە ازاماتتاردىڭ تۋىستارىمەن تۇراقتى بايلانىستا.
زاڭگەر قازاقستان ءسىم جۇمىسىن وڭ باعالاپ، ۆەدومستۆو ازاماتتاردى ەلگە قايتارۋ ءۇشىن بار كۇشىن سالىپ جاتقانىن اتاپ ءوتتى.
رەسەيگە جۇمىس ىستەۋگە بارعان قازاقستاندىقتاردىڭ ۋكرايناداعى سوعىسقا تاپ بولعانى وسى ايدىڭ باسىندا بەلگىلى بولدى. ەر ادامدار بىرنەشە بەينەۇندەۋ جاريالاعان. ال 7 قازاندا ولاردىڭ تۋىستارى جاقىندارىن ەلگە تەزىرەك قايتارۋدى سۇراپ، استاناداعى ءسىم عيماراتىنا بارعان.
ولاردىڭ ايتۋىنشا، رەسەيگە كۇزەت اگەنتتىكتەرىنە، ەت كومبيناتتارى مەن قۇس فابريكالارىنا جۇمىسقا ورنالاسۋ ءۇشىن بارعان. الايدا ەڭبەك شارتتارىنىڭ ورنىنا ولارعا رەسەي قارۋلى كۇشتەرىندە قىزمەت ەتۋ تۋرالى كەلىسىمشارتتارعا قول قويۋ ۇسىنىلعان.
باستاپقىدا توپتا 15 قازاقستاندىق بولعان. كەيىن ەر ادامدار توپتا توعىز-ون ادام قالعانىن، ال قالعاندارىنىڭ ۋكرايناداعى سوعىس ايماعىنا جىبەرىلگەنىن حابارلاعان.
بۇعان دەيىن قازاقستان سىرتقى ىستەر مينيسترلىگى رەسەي تاراپىمەن كەلىسسوز جۇرگىزىپ جاتقانىن جانە ەلگە قايتارۋدى قاجەت ەتەتىن ازاماتتاردىڭ ءتىزىمىن قالىپتاستىرىپ جاتقانىن حابارلاعان.
