اقتاۋ تۇرعىندارىن ساپالى اۋىز سۋمەن قامتاماسىز ەتۋ ماقساتىندا «كاسپي» زاۋىتىندا سۋ تۇششىتاتىن ءۇش قوندىرىعىنىڭ بىرەۋىن قوسۋعا دايىندىق جۇمىستارى ءجۇرىپ جاتىر.
بۇل جۇمىستارعا جاۋاپتى مەردىگەر مەكەمە - «كاسپيان كونسترۋكتورس تراست» كومپانياسى.
مەردىگەر مەكەمەنىڭ جۇمىستى كەشەۋىلدەتۋىنە بايلانىستى، قوندىرعىنى ىسكە قوسۋدا ىركىلىس بولدى. مەردىگەر كومپانيا باسشىلارى قاراشا ايىنىڭ سوڭىنا دەيىن 10 000 تەكشە مەترلىك قوندىرعىنى ىسكە قوسۋعا ۋادە بەرىپ وتىر.
جالپى زاۋىتتى مودەرنيزاتسيالاۋ جۇمىستارى ءۇش جىلدان بەرى جۇرگىزىلۋدە. جوبا بويىنشا زاۋىتتىڭ ءوندىرىستىڭ قۋاتىن 40 000 م3-قا دەيىن ارتتىرۋ كوزدەلگەن.
-تەحنولوگيالىق تارتىپكە سايكەس، قوندىرعىلاردى ىسكە قوسقاننان كەيىن، ون كۇندەي سۋ دايىندالادى. ونىڭ ىشىندە قوسۋ-رەتتەۋ جانە زالالسىزداندىرۋ جۇمىستارى بار. بەكىتىلگەن جوسپارعا سايكەس، قالاعا 20 قاراشا كۇنى ءبىرىنشى 5000 م3 سۋ بەرىلەدى. ال قاراشا ايىنىڭ سوڭىنا دەيىن زاۋىت قوندىرعى ارقىلى 10 000 م3-قا جۋىق سۋدى بەرۋدى جوسپارلانىپ وتىر، - دەدى «كاسپي» سۋ تۇششىتۋ زاۋىتى جشس ديرەكتورى سەرىك گۋسمان.
سونداي-اق، اقتاۋدا قۇيىلىس كەن ورنىنان «كاسپي» سۋ تۇششىتۋ زاۋىتىنا دەيىنگى ۇزىندىعى 47 شاقىرىم سۋ قۇبىرى سالىنۋدا. مەردىگەر مەكەمە – «اليانس لتد» جشس. قۇرىلىس جۇمىستارىنا 15 ارنايى تەحنيكا جانە 32 قىزمەتكەر جۇمىلدىرىلدى. اتالعان جوبا قالاداعى اۋىز سۋ جەتىسپەۋشىلىگى ماسەلەسىنىڭ رەتتەلۋىنە سەپتىگىن تيگىزەدى.
-قۇيىلىس كەن ورنىنان «كاسپي» سۋ تۇششىتۋ زاۋىتىنا دەيىنگى ۇزىندىعى 47 شاقىرىم، ديامەترلەرى 900 مم قۇرايتىن سۋ قۇبىرى سالىنۋدا. جۇمىستار قارقىندى جۇرگىزىلۋدە. اتالعان جۇمىستار اياقتالعاننان كەيىن، جارتىلاي ۋچاسكەسىندە قۇبىردى سۋمەن تولتىرۋعا قوياتىن بولامىز، - دەدى وبلىستىق ەنەرگەتيكا جانە تكش باسقارماسىنىڭ ءبولىم باسشىسى انۆار تۋلياكوۆ.
سونىمەن قاتار، اقشۇقىر اۋىلىندا ورنالاسقان «اقتاۋ» سۋ تۇششىتۋ زاۋىتى دا قالا تۇرعىندارىن قوسىمشا سۋمەن قامتاماسىز ەتۋدە.
«اقتاۋ» سۋ تۇششىتۋ زاۋىتىنىڭ قۇرىلىسى جەكە ينۆەستور تاراپىنان 2020 جىلى باستالعان بولاتىن. زاۋىت 2023 جىلدىڭ ناۋرىز ايىندا قولدانىسقا بەرىلدى.
-اتالعان زاۋىت تاۋلىگىنە 5 000 م3 اۋىز سۋ وندىرەدى. زاۋىت وندىرگەن اۋىز سۋدى وسجت-4 ارقىلى قالانىڭ جوعارى شاعىن اۋداندارىنا بەرەدى، - دەدى وبلىستىق ەنەرگەتيكا جانە تكش باسقارماسىنىڭ سۋمەن جابدىقتاۋ جانە سۋ بۇرۋدى دامىتۋ ءبولىمىنىڭ باس مامانى ءجۇسىپ مۇحامەد.
جالپى اقشۇقىر جانە سايىن شاپاعاتوۆ اۋىلى وسىعان دەيىن وسجت-4 ارقىلى «ماەك» جشس جانە «اقتاۋ» سۋ تۇششىتۋ زاۋىتى ارقىلى اۋىز سۋمەن قامتاماسىز ەتىلگەن بولاتىن. بيىل جاز ايلارىندا سايىن شاپاعاتوۆ اۋىلىندا قۋاتتىلىعى تاۋلىگىنە 4 000 م3 اۋىز سۋ وندىرەتىن قوندىرعى ورناتىلدى. بۇگىندە اقشۇقىر جانە سايىن شاپاعاتوۆ اۋىلى اتالعان قوندىرعى ارقىلى اۋىز سۋمەن قامتاماسىز ەتىلۋدە. بۇل ءوز كەزەگىندە بوساعان سۋ كولەمىن اقتاۋ قالاسىنا بۇرۋعا مۇمكىندىك بەردى.
