يۋنەسكو يران، ليۆان جانە يزرايل اۋماعىنداعى مادەني-تاريحي نىساندارعا كەلتىرىلگەن زالالدى باعالاپ جاتىر، دەپ حابارلايدى “ادىرنا” ۇلتتىق پورتالى
ازەرتادج مالىمەتىنشە، اقش پەن ءيزرايلدىڭ يران اۋماعىنا جاساعان سوققىلارى سالدارىنان كەمىندە ءتورت مادەني نىسان زاقىمدانعان. قيراۋلاردىڭ جىلدامدىعى مەن اۋقىمى يران مەن ليۆان بيلىگىن الاڭداتىپ وتىر. وسىعان بايلانىستى ولار يۋنەسكو-عا بىرقاتار نىسانداردى ەرەكشە قورعاۋعا الىناتىن تىزىمگە ەنگىزۋ تۋرالى ءوتىنىش جولداعان.
يۋنەسكو تەگەراندا ورنالاسقان گولەستان سارايى كەشەنىنىڭ زاقىمدانعانىن راستادى. سونىمەن قاتار XVII عاسىرداعى چەحەل-سوتۋن سارايى مەن ماسدجيد-جامە مەشىتى دە زارداپ شەككەن.
بۇدان بولەك، حورراماباد اڭعارى ماڭىنداعى بىرقاتار نىساندارعا زيان كەلگەن. ولاردىڭ قاتارىندا شامامەن ب.ز.د. 63 مىڭ جىل بۇرىن ادامدار مەكەندەگەنىن دالەلدەيتىن ەجەلگى ۇڭگىرلەر مەن جارتاستاعى باسپانا بار.
قاقتىعىستىڭ سالدارى ءوڭىردىڭ باسقا بولىكتەرىنە دە اسەر ەتۋدە. يۋنەسكو يزرايلدەگى اق قالا مەن ليۆانداعى تير قالاسى اۋماعىنداعى نىسانداردىڭ جاعدايىن دا باقىلاۋدا.
بۇۇ باس حاتشىسىنىڭ رەسمي وكىلى ستەفان ديۋجارريك قاقتىعىستار كەزىندە تەك بەيبىت تۇرعىندار عانا ەمەس، ازاماتتىق ينفراقۇرىلىم مەن تاريحي مۇرا نىساندارى دا زارداپ شەگەتىنىن اتاپ ءوتتى.
ال Human Rights Watch ۇيىمىنىڭ ساراپشىسى بونني دوچەرتي مادەني مۇرانىڭ ءبۇلىنۋى قوعامنىڭ تاريحي جادىن السىرەتىپ، ورتاق قۇندىلىقتارعا نۇقسان كەلتىرەتىنىن مالىمدەدى.
