سوپىلىق ءىلىمنىڭ كورنەكتى وكىلى قوجا احمەت ءياساۋيدىڭ ايگىلى ەڭبەگى ديۋاني حيكمەت ورىس تىلىنە اۋدارىلىپ، وقىرمانعا جول تارتتى. ۇلت رۋحانياتىنىڭ اسىل مۇرالارىنىڭ ءبىرى سانالاتىن بۇل تۋىندى ەندى تمد ەلدەرىندەگى ورىس ءتىلدى اۋديتورياعا كەڭىنەن تانىستىرىلماق. بۇل تۋرالى Turkistan تەلەارنسى جاريالادى، دەپ حابارلايدى "ادىرنا".
شىعارمانى بەلورۋس زەرتتەۋشىسى الەكسەي كۋپرياكوۆ اۋدارعان. اۋدارما بارىسىندا ەڭبەكتىڭ ماعىنالىق تەرەڭدىگى مەن رۋحاني مازمۇنىن بارىنشا ساقتاۋعا ەرەكشە كوڭىل بولىنگەن.
ۇزاق جىلدارعا سوزىلعان عىلىمي ىزدەنىستىڭ ناتيجەسىندە كىتاپتىڭ ءبىرىنشى تومى جارىق كوردى. وندا «ديۋاني حيكمەتتىڭ» العاشقى 85 حيكمەتى قامتىلعان. باسىلىم شامامەن 160 بەتتەن تۇرادى.
ال ەڭبەكتىڭ قالعان بولىكتەرى ەكىنشى تومدا جاريالانباق. اۆتورلار ونى الداعى ءۇش جىل ىشىندە شىعارادى دەپ جوسپارلاپ وتىر. ەكىنشى بولىمگە تاعى 60 حيكمەت ەنگىزىلەدى.
مامانداردىڭ ايتۋىنشا، بۇل باسىلىم قوجا احمەت ياساۋي مۇراسىن حالىقارالىق دەڭگەيدە كەڭىنەن تانىتۋعا جانە تۇركى رۋحانياتىنىڭ قۇندىلىقتارىن ناسيحاتتاۋعا مۇمكىندىك بەرەدى.
