تاجىكستاننىڭ سولتۇستىگىندەگى سوعدى وبلىسىنىڭ قانساي ەلدى مەكەنىنەن 85 ميلليون جىلدىق دينوزاۆر سۇيەكتەرىنىڭ سىنىقتارى جانە باسقا جانۋارلاردىڭ قاڭقاسى تابىلدى، دەپ حابارلايدى "ادىرنا" ۇلتتىق پورتالى ازيا-پليۋس-كە سىلتەمە جاساپ.
«دينوزاۆر شامامەن 85 ميلليون جىل بۇرىن ءومىر سۇرگەن. تابىلعان سۇيەكتەردىڭ دەنەنىڭ قاي بولىگىنە تيەسىلى ەكەنى ودان ءارى زەرتتەۋلەر ناتيجەسىندە بەلگىلى بولادى»، – دەدى ماگيسترانت-پالەونتولوگ ۋمەد نابيەۆ.
ەكاتەرينبۋرگ، سانكت-پەتەربۋرگ جانە ماسكەۋدەن كەلگەن پالەونتولوگتاردان قۇرالعان رەسەي-تاجىكستان ەكسپەديتسياسى ۇلكەن كانوندا قازبا جۇمىستارىن 20-28 قازان ارالىعىندا جۇرگىزدى. عالىمدار قولتىراۋىن مەن تاسباقانىڭ ساۋىت بولىكتەرىن، كەسىرتكەلەردىڭ، سالاماندرلاردىڭ، باقالاردىڭ جانە بالىقتاردىڭ قالدىقتارىن تاپتى.
«ءبىز ۇساق بولىكتەردى – سۇيەكتەردى، ومىرتقالاردى، تىستەردى، جاقتاردى زەرتتەۋگە مۇمكىندىك بەرەتىن جۋ ءادىسىن قولداندىق. ولار وتە نازىك بولعاندىقتان، تاۋ جىنىستارىنىڭ بەتىنە ارنايى جەلىم جاقتىق، بۇل سۇيەكتەردى ءبۇتىن كۇيىندە زاقىمداماي الۋعا مۇمكىندىك بەردى»، – دەدى ۋمەد نابيەۆ.
ەكسپەديتسيانىڭ كەيبىر تابىستارى سوعدى وبلىستىق تاريحي-ولكەتانۋ مۋزەيىنە تاپسىرىلدى. قازبا جۇمىستارىن 2025 جىلدىڭ مامىر ايىندا جالعاستىرۋ جوسپارلانۋدا. زەرتتەۋشىلەر تسەمەنت وندىرۋگە قاجەتتى شيكىزات ءوندىرۋ ناتيجەسىندە پايدا بولعان وسى ايماقتاعى جاڭا كانونداردى زەرتتەۋدى كوزدەپ وتىر.
«ءىرى جانۋارلاردىڭ قالدىقتارى بۇرىن جاقسى زەرتتەلگەن، بىراق ۇساق جانۋارلار – امفيبيالار نەمەسە باۋىرىمەن جورعالاۋشىلار تۋرالى ولاي ايتۋ قيىن. سوندىقتان كەلەسى ەكسپەديتسيا ۇساق قوسمەكەندىلەردى دە ىزدەۋمەن اينالىساتىن بولادى. ايتا كەتۋ كەرەك، قازىرگى باقالار ەجەلگى اتا-بابالارىنىڭ ءپىشىنى مەن ولشەمىن ساقتاپ قالعان»، – دەپ اتاپ ءوتتى تاجىك پالەونتولوگى.
