Täjıkstannyŋ soltüstıgındegı Soǧdy oblysynyŋ Qansai eldı mekenınen 85 million jyldyq dinozavr süiekterınıŋ synyqtary jäne basqa januarlardyŋ qaŋqasy tabyldy, dep habarlaidy "Adyrna" ūlttyq portaly Aziia-plius-ke sılteme jasap.
«Dinozavr şamamen 85 million jyl būryn ömır sürgen. Tabylǧan süiekterdıŋ denenıŋ qai bölıgıne tiesılı ekenı odan ärı zertteuler nätijesınde belgılı bolady», – dedı magistrant-paleontolog Umed Nabiev.
Ekaterinburg, Sankt-Peterburg jäne Mäskeuden kelgen paleontologtardan qūralǧan Resei-Täjıkstan ekspedisiiasy ülken kanonda qazba jūmystaryn 20-28 qazan aralyǧynda jürgızdı. Ǧalymdar qoltyrauyn men tasbaqanyŋ sauyt bölıkterın, kesırtkelerdıŋ, salamandrlardyŋ, baqalardyŋ jäne balyqtardyŋ qaldyqtaryn tapty.
«Bız ūsaq bölıkterdı – süiekterdı, omyrtqalardy, tısterdı, jaqtardy zertteuge mümkındık beretın juu ädısın qoldandyq. Olar öte näzık bolǧandyqtan, tau jynystarynyŋ betıne arnaiy jelım jaqtyq, būl süiekterdı bütın küiınde zaqymdamai aluǧa mümkındık berdı», – dedı Umed Nabiev.
Ekspedisiianyŋ keibır tabystary Soǧdy oblystyq tarihi-ölketanu muzeiıne tapsyryldy. Qazba jūmystaryn 2025 jyldyŋ mamyr aiynda jalǧastyru josparlanuda. Zertteuşıler sement öndıruge qajettı şikızat öndıru nätijesınde paida bolǧan osy aimaqtaǧy jaŋa kanondardy zertteudı közdep otyr.
«Irı januarlardyŋ qaldyqtary būryn jaqsy zerttelgen, bıraq ūsaq januarlar – amfibiialar nemese bauyrymen jorǧalauşylar turaly olai aitu qiyn. Sondyqtan kelesı ekspedisiia ūsaq qosmekendılerdı de ızdeumen ainalysatyn bolady. Aita ketu kerek, qazırgı baqalar ejelgı ata-babalarynyŋ pışını men ölşemın saqtap qalǧan», – dep atap öttı täjık paleontology.
Ūqsas jaŋalyqtar
