تاجىكستان پرەزيدەنتى ەمومالي راحمون يراننىڭ بۇرىنعى جوعارى رۋحاني كوشباسشىسى اياتوللا ءالي حامەنەيمەن قوشتاسۋدىڭ رەسمي راسىمىنە قاتىسادى، دەپ حابارلايدى "ادىرنا" ءتىلشىسى.
بۇل تۋرالى Mojnews اگەنتتىگى يراننىڭ دۋشانبەدەگى ەلشىسى اليرەزا حاگيگيانعا سىلتەمە جاساپ حابارلادى.
ەلشىنىڭ ايتۋىنشا، تاجىكستان پرەزيدەنتىنىڭ راسىمگە قاتىسۋى ەل باسشىلىعىنىڭ يسلام رەۆوليۋتسياسىنىڭ كوشباسشىسىنا دەگەن قۇرمەتىن، ەكى مەملەكەت اراسىنداعى دوستىق قارىم-قاتىناستى بىلدىرەدى.
بۇعان دەيىن يراننىڭ ۇيىمداستىرۋ كوميتەتى قوشتاسۋ راسىمىنە 30-دان استام مەملەكەتتىڭ رەسمي وكىلدەرى كەلەتىنىن حابارلاعان بولاتىن. كەيىن بۇل كورسەتكىش شامامەن 40 ەلگە دەيىن ۇلعايعانى مالىمدەلدى. سونىمەن قاتار ۇيىمداستىرۋشىلار الەمنىڭ 90-نان استام ەلىنەن ءدىني، ساياسي جانە قوعام قايراتكەرلەرى قاتىساتىنىن حابارلادى. شەتەلدىك دەلەگاتسيالاردىڭ تولىق ءتىزىمى ازىرگە جاريالانعان جوق.
وزبەكستان يرانعا دەلەگاتسيانى ولي ءماجىلىس زاڭ شىعارۋ پالاتاسىنىڭ سپيكەرى نۋريددين يسمويلوۆتىڭ باسشىلىعىمەن جىبەرەدى. رەسەيدەن قارالى ءىس-شارالارعا قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ قاتىسادى. رەسەي دەلەگاتسياسىنىڭ قۇرامىنا ءسىم وكىلدەرى، ورىس پراۆوسلاۆيە شىركەۋىنىڭ ءدىن قىزمەتكەرلەرى، سۋننيت مۇفتيلەرى مەن شيت عالىمدارى دا ەنەدى.
پاكىستان دەلەگاتسياسىن پرەمەر-مينيستر شاحباز شاريف باستاپ بارادى. قىتاي اتىنان بۇكىلقىتايلىق حالىق وكىلدەرى جينالىسى تۇراقتى كوميتەتى توراعاسىنىڭ ورىنباسارى حە ۆەي قاتىسادى. ءۇندىستاننان مەملەكەتتىك سىرتقى ىستەر ءمينيسترى پابيترا مارگەريتا مەن بيحار شتاتىنىڭ گۋبەرناتورى سايەد اتا حاسناين كەلەدى. ال قازاقستاننان بۇل راسىمگە قاتىسۋعا سىرتقى ىستەر ءمينيسترى ەرمەك كوشەرباەۆ بارۋى مۇمكىن.
سونىمەن قاتار يران بيلىگى ەل تۇرعىندارىن قوشتاسۋ راسىمىنە جاپپاي قاتىسۋعا شاقىردى. پارلامەنت توراعاسى مۇحامماد-باعەر عاليباف يراندىقتار «قازا تاپقان كوشباسشىنىڭ قانى ءۇشىن ءادىل جازانى تالاپ ەتەتىن حالىقتىڭ ءۇنىن الەمگە جەتكىزۋى ءتيىس» ەكەنىن ايتتى.
ۇيىمداستىرۋ كوميتەتىنىڭ وكىلى مۇحامماد-رەزا ميرتادجەدديني اياتوللانىڭ قازاسىنا كىنالىلەردى ۇلتتىق جانە حالىقارالىق دەڭگەيدە جاۋاپقا تارتۋ قارالى ءىس-شارالاردىڭ نەگىزگى ماقساتتارىنىڭ ءبىرى ەكەنىن مالىمدەدى.
قوشتاسۋ ءراسىمى 4 شىلدەدە تەگەرانداعى «موساللا» كەشەنىندە باستالادى. 5 شىلدەدە جانازا نامازى وقىلىپ، 6 شىلدەدە تەگەران كوشەلەرىندە قارالى شەرۋ وتەدى. كەيىن ءالي حامەنەيدىڭ دەنەسى قۇم قالاسىنا جەتكىزىلىپ، 7 شىلدەدە قوشتاسۋ ءراسىمى جالعاسادى. 8 شىلدەدە قارالى ءىس-شارالار يراكتىڭ نادجاف جانە كەربالا قالالارىندا وتەدى. ال جەرلەۋ ءراسىمى 9 شىلدەدە مەشحەد قالاسىنداعى يمام رەزا كەسەنەسىندە ۇيىمداستىرىلادى.
ەسكە سالايىق، ءالي حامەنەي 28 اقپاندا اقش پەن ءيزرايلدىڭ يرانعا جاساعان اۋە سوققىلارى سالدارىنان قازا تاپتى. العاشىندا ونى ناۋرىز ايىندا جەرلەۋ جوسپارلانعانىمەن، اسكەري ءىس-قيمىلداردىڭ جالعاسۋىنا بايلانىستى ءراسىم كەيىنگە شەگەرىلگەن.
