قورعانىس مينيسترلىگى ۇشاق اپاتىنان قازا تاپقان اسكەري قىزمەتكەردىڭ اتى-ءجونىن جاريالادى، دەپ حابارلايدى "ادىرنا" ۇلتتىق پورتالى.
"اقتوبە وبلىسىنداعى وقۋ-جاتتىعۋ ۇشۋى كەزىندە بولعان اۆياتسيالىق اپات سالدارىنان 1988 جىلى تۋعان اۋە قورعانىسى كۇشتەرى اسكەري ينستيتۋتى اۆياتسيالىق ەسكادريلياسىنىڭ وفيتسەر-نۇسقاۋشىسى مايور باتىر قايراتۇلى ورازىمبەتوۆ قايعىلى جاعدايدا قازا تاپتى", — دەلىنگەن حابارلامادا.
وفيتسەر اۋە قورعانىسى كۇشتەرى اسكەري ينستيتۋتىن 2009 جىلى «ۇشاقتار، تىكۇشاقتار جانە اۆياتسيالىق قوزعالتقىشتار» ماماندىعى بويىنشا بىتىرگەنى انىقتالدى. قىزمەت بارىسىندا اۋە قورعانىسى كۇشتەرىندە ءتۇرلى لاۋازىمداردان وتكەن.
مي-8 تىكۇشاعىن پايدالانۋدا ۇلكەن تاجىريبەسى بار، جالپى ۇشۋ ۋاقىتى 500 ساعاتتان اسادى. قىزمەت بارىسىندا جوعارى كاسىبيلىك پەن ادالدىق تانىتقان. ۇيلەنگەن، ارتىندا ەكى بالاسى قالدى.
ودان بولەك، مينيسترلىكتىڭ حابارلاماسىندا جاراقات العاندار تۋرالى دا اقپارات بەرىلگەن.
"اپاتتى جاعدايداعى قونۋ كەزىندە زارداپ شەككەن اسكەري ينستيتۋت اۆياتسيالىق ەسكادريلياسىنىڭ كومانديرى مايور بيبارىس يبراەۆ پەن وقۋ-جاتتىعۋ اۆياتسيالىق ورتالىعىنىڭ اعا ۇشقىش-نۇسقاۋشىسى اعا لەيتەنانت رۇستەم نىعمەتوۆ قازىر وبلىستىق اۋرۋحانادا جاتىر. جاعدايلارى تۇراقتى اۋىر. ولارعا بارلىق قاجەتتى مەديتسينالىق كومەك كورسەتىلۋدە", — دەپ قوستى ۆەدومستۆو ءباسپاسوز قىزمەتى.
قازا تاپقان وفيتسەر مەن زارداپ شەككەندەردىڭ تۋىستارى مەن جاقىندارىنا جان-جاقتى قولداۋ كورسەتىلۋدە.
ايتا كەتەيىك، 9 قاراشادا بولعان تىكۇشاق اپاتى تۋرالى وقيعا كۋاگەرلەرى ايتىپ بەردى.
