قازاقستاننىڭ قورعانىس ءمينيسترى داۋرەن قوسانوۆ ماڭعىستاۋ وبلىسىندا كاسپي تەڭىزىندەگى اسكەري وقۋ-جاتتىعۋ كەزىندە قازا تاپقان اسكەري قىزمەتشىلەردىڭ وتباسىلارىنا باردى، دەپ حابارلايدى "ادىرنا" ۇلتتىق پورتالى.
مينيستر مارقۇمداردىڭ تۋعان-تۋىستارى مەن جاقىندارىنا كوڭىل ايتىپ، ولاردىڭ قايعىسىنا ورتاق ەكەنىن جەتكىزدى.
«ولار ءبىز ءۇشىن جاي عانا اسكەري قىزمەتكەرلەر ەمەس – ءبىزدىڭ قارۋلاستارىمىز، ۇلدارىمىز بەن باۋىرلارىمىز. ولاردىڭ قازاسى – بارشا قارۋلى كۇشتەر ءۇشىن ورنى تولماس اۋىر قازا. ءبىز تۋعان-تۋىستارى مەن جاقىندارىنىڭ قايعىسىنا ورتاقتاسىپ، وسى قيىن كەزەڭدە ولارمەن بىرگە بولامىز»، – دەدى داۋرەن قوسانوۆ.
قازا تاپقان اسكەري قىزمەتشىلەردىڭ اراسىندا مەيرامبەك بەردىحانوۆ، ازامات ءمادىحان جانە داستان بەگەي بار. ولار جاڭاوزەن قالاسىنان، ال ميراس تۇردىبەكۇلى جەتىباي اۋىلىنان مەرزىمدى اسكەري قىزمەتكە شاقىرىلعان.
قورعانىس مينيسترلىگىنىڭ مالىمەتىنشە، اسكەري قىزمەتشىلەر قىزمەت بارىسىندا ءوز مىندەتتەرىن جاۋاپكەرشىلىكپەن اتقارىپ، ءتارتىپتى سارباز رەتىندە تانىلعان.
داۋرەن قوسانوۆ مارقۇمداردىڭ وتباسىلارىنا قاجەتتى كومەك كورسەتىلەتىنىن ايتتى. قورعانىس مينيسترلىگى قازا بولعانداردىڭ جاقىندارىنا جان-جاقتى قولداۋ كورسەتىپ، تۋىنداعان ماسەلەلەردى شەشۋگە جاردەمدەسەدى. ۆەدومستۆو وتباسىلارمەن تۇراقتى بايلانىستا بولادى.
ەسكە سالايىق، 24 قىركۇيەكتە ماڭعىستاۋ وبلىسىندا اسكەري-تەڭىز كۇشتەرىنىڭ وقۋ-جاتتىعۋى كەزىندە اۋا رايى كۇرت ناشارلاپ، قاتتى جەل سوققان. سونىڭ سالدارىنان 17 اسكەري قىزمەتشى تەڭىزگە ءتۇسىپ كەتكەن. العاشقى مالىمەت بويىنشا، ون ءتورت اسكەري قىزمەتشىنىڭ قازا بولعانى، ۇشەۋىنىڭ قۇتقارىلعانى حابارلاندى.
