قانىش ابۋباكىروۆ قازاقستان قورعانىس ءمينيسترىنىڭ ءبىرىنشى ورىنباسارى بولىپ تاعايىندالدى، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى پرەزيدەنتىنىڭ وكىمىمەن قانىش اسانحانۇلى ابۋباكىروۆ قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى قىزمەتىنە تاعايىندالدى. بۇعان دەيىن وسى لاۋازىمدا سۇلتان قامالەتدينوۆ قىزمەت اتقارعان. ول 17 قاڭتار كۇنى ءوز مىندەتىنەن بوساتىلدى.
قانىش ابۋباكىروۆ 1977 جىلى تۇركىستان وبلىسى، ورداباسى اۋدانىندا دۇنيەگە كەلگەن. ول قر قارۋلى كۇشتەرى اسكەري اكادەمياسىن جانە ۇلتتىق قورعانىس ۋنيۆەرسيتەتىن بىتىرگەن. اسكەري قىزمەتىن دەسانتتىق-شابۋىلداۋ باتالونى بارلاۋ روتاسى كومانديرىنەن باستاپ، قۇرلىق اسكەرلەرى باس قولباسشىسىنىڭ ءبىرىنشى ورىنباسارى – باس شتاب باستىعىنا دەيىنگى لاۋازىمداردا ءوتتى.
سونىمەن قاتار قانىش ابۋباكىروۆ اەروۇتقىر اسكەرلەرى قولباسشىسىنىڭ ورىنباسارى، "باتىس" وڭىرلىك قولباسشىلىعى اسكەرلەرىنىڭ قولباسشىسى، قۇرلىق اسكەرلەرى دەسانتتىق-شابۋىلداۋ اسكەرلەرىنىڭ قولباسشىسى قىزمەتتەرىن اتقارعان.
ول II دارەجەلى "ايبىن", II دارەجەلى "داڭق" وردەندەرىمەن جانە "جاۋىنگەرلىك ەرلىگى ءۇشىن" مەدالىمەن ماراپاتتالعان.
