قازاقستان پروكۋراتۋراسى ەلدەن ميلليونداعان تەڭگە قاراجاتتى جىمقىرىپ، قاشقان ازاماتتىڭ ۇستالعانىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى باس پروكۋراتۋرا مالىمدەدى.
9 قاراشا كۇنى باس پروكۋراتۋرا قازاقستان رەسپۋبليكاسىنىڭ ستوكگولمدەگى ەلشىلىگىنىڭ قولداۋىمەن شۆەتسيا كورولدىگىنەن قازاقستان ازاماتىن اسا ءىرى كولەمدە بوتەننىڭ مۇلكىن جىمقىرعانى ءۇشىن قىلمىستىق جاۋاپكەرشىلىككە تارتۋ ماقساتىندا ەكستراديتسيالادى. تەرگەۋ نۇسقاسى بويىنشا، كۇدىكتى 2015 جىلدان 2020 جىلعا دەيىن شىمكەنتتەگى ساۋدا ورتالىعىندا جۇمىس ىستەي ءجۇرىپ، شامامەن 57 ميلليون تەڭگە قاراجاتتى جىمقىرىپ ۇلگەرگەن.
قىلمىسكەر جاسىرىنىپ، حالىقارالىق ىزدەۋ جاريالانعان. بيىل اقپاندا كۇدىكتى شۆەتسيادا ۇستالعان بولاتىن.
قازاقستان رەسپۋبليكاسىنىڭ باس پروكۋراتۋراسىنىڭ سۇراۋى بويىنشا ول قازاقستانعا ەكستراديتسيالانىپ، قازىرگى ۋاقىتتا استانا قالاسىنداعى تەرگەۋ يزولياتورىندا وتىر.
بۇل قىلمىس ءۇشىن 7 جىلدان 12 جىلعا دەيىن باس بوستاندىعىنان ايىرۋ جازاسى كوزدەلگەن، سونىمەن قاتار مۇلىكتى تاركىلەۋ جانە 10 جىلعا دەيىن بەلگىلى ءبىر لاۋازىمداردى اتقارۋعا نەمەسە بەلگىلى ءبىر قىزمەت تۇرلەرىمەن اينالىسۋ قۇقىعىنان ايىرۋ جازاسى قاراستىرىلعان.
