پروكۋراتۋرا الماتى قالالىق پوليتسيا دەپارتامەنتى بۇرىنعى باستىعىنىڭ ۇستالعانى تۋرالى اقپاراتقا پىكىر ءبىلدىردى، دەپ حابارلايدى "ادىرنا" ۇلتتىق پورتالى.
كاسىپكەر قايرات قۇدايبەرگەننىڭ الەۋمەتتىك جەلىسىندەگى پاراقشاسىندا ەكس-باستىق تايمەردەنوۆتىڭ "قاڭتار وقيعاسى" بويىنشا ۇستالعانى ايتىلعان.
“دەرەكوزىمىز الماتى قالالىق ءىىد بۇرىنعى باستىعى قانات تايمەردەنوۆتىڭ "قاڭتار وقيعاسى" بويىنشا ۇستالعانىن حابارلادى. دەرەككوز قۇقىق قورعاۋ ورگاندارىنىڭ جوعارى لاۋازىمدى وكىلدەرىنىڭ بۇرىنعى ىشكى ىستەر ءمينيسترى ەرلان تۇرعىمباەۆتىڭ كۋالىگى اياسىندا ۇستالعانىن حابارلادى”، – دەلىنگەن حابارلامادا.
الەۋمەتتىك جەلىدە تاراعان اقپاراتقا قاتىستى پروكۋراتۋرا مالىمدەمە جاسادى.
"الماتى قالاسىنىڭ پوليتسيا دەپارتامەنتىنىڭ ەكس-باسشىسى تايمەردەنوۆتىڭ ۇستالعانى تۋرالى ءتۇرلى تەلەگرام-كانالداردا تاراعان اقپارات شىندىققا سايكەس كەلمەيدى. وسىعان وراي، باس پروكۋراتۋرا كورىنەۋ جالعان اقپارات تاراتقانى ءۇشىن قىلمىستىق جاۋاپكەرشىلىككە تارتىلاتىنىن ەسكەرتىپ، بارلىق ازاماتتار مەن باق وكىلدەرىن رەسمي اقپارات كوزدەرىنە سەنۋگە شاقىرادى”، – دەلىنگەن حابارلامادا.
