شاكارىم ۋنيۆەرسيتەتىنىڭ وقىتۋشىسى، مادەنيەت سالاسىنىڭ ۇزدىگى، ءانشى قايرات قابىشەۆ گيننەس رەكوردتار كىتابىنا توقتاۋسىز 100 ءان ايتۋعا ءوتىنىش بەردى. سوعان ارنالعان 12 قاراشا كۇنى جولداما كونتسەرتى وتەدى، دەپ حابارلايدى “ادىرنا” ۇلتتىق پورتالى.
قازاق ءانىنىڭ بيىكتىگىن، سۇلۋلىعىن، قازاق ءانشىسىنىڭ داۋىس قۋاتىن دالەلدەپ، كورسەتپەككە گيننەس رەكوردتار كىتابىنا توقتاۋسىز ايتاتىن 100 ءاندى الداعى ۋاقىتتا رەكوردتار كىتابىنىڭ وكىلدەرى ارنايى كەلىپ تىڭدايتىن بولادى.
“1918 جىلى تاشكەندە قۇرمانبەك جانداربەكوۆ 101 ءان ايتىپتى دەگەن ءسوز بار... ارادا ءجۇز جىلدان اسا ۋاقىتتا وسى دۇنيە قايتا جالعاسپاقشى... قازاقتا تاڭدى تاڭعا ۇرىپ ءان ايتقان، جىر جىرلاعان قانشاما انشىلەر مەن جىرشىلار ءوتتى. بۇل قازىرگى جىرشىلار اراسىندا ءالى دە ساقتالعانمەن، انشىلەر اراسىندا بۇلاي ءان ايتۋ ءداستۇرىنىڭ توقتاعانىنا ءبىرشاما ۋاقىت بولدى-اۋ! قايرەكەڭ سولاردىڭ ءىزىن جالعاپ، بۇگىنگى جاھاندانعان قوعامنىڭ ەسىنە قايتا ءبىر تۇسىرمەكشى”، دەيدى ءداستۇرلى ءانشى ەركىن شۇكىمان Facebook پاراقشاسىندا.
