بىلتىر استاناداعى فيزيكا-ماتەماتيكا باعىتىنداعى زياتكەرلىك مەكتەبىندە ۇلتتىق قۇندىلىقتى ۇلىقتاعان كەڭاۋقىمدى دومبىرا ءدارىسى وتكەن ەدى. 2022 جىلدىڭ مامىر ايىندا وقۋ جىلىن اياقتاعان اتالمىش ەڭ اۋقىمدى دومبىرا ساباعى الەم نازارىن اۋدارىپ، گيننەسس رەكوردتار كىتابىنا ەندى، دەپ حابارلايدى “ادىرنا” ۇلتتىق پورتالى.
نازارباەۆ زياتكەرلىك مەكتەبى وكىلدەرىنىڭ ايتۋىنشا، ونلاين رەكوردتى تىركەۋ تۋرالى دەرەك گيننەسس رەكوردتار كىتابىنىڭ رەسمي سايتىندا جاريالانعان.
- NIS-تەگى دومبىرا ساباعى – ءبىر مەكتەپتىڭ مىڭعا جۋىق وقۋشىسى ۇلتتىق مۋزىكالىق اسپاپتى جەتىك مەڭگەرىپ، بىرگە كۇي ورىنداعان الەمدەگى تۇڭعىش وقيعا. ەڭ اۋقىمدى دومبىرا ساباعىنا قوسىمشا ءبىلىم بەرۋ پەداگوگى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى ايتجان توقتاعان ديريجەرلىك ەتتى. زياتكەرلەردىڭ ورىنداۋىندا "سارىارقا", "بالبىراۋىن", "ەركەم-اي", "كەڭەس", "جاستار ءبيى" سىندى اتاقتى كۇيلەر كۇمبىرلەپ، تۋىندىلاردىڭ شىعۋ تاريحى باياندالدى، - دەلىنگەن اقپاراتتا.
گيننەسس رەكوردتار كىتابىنىڭ تالاپتارىنا ساي اۋقىمدى دومبىرا ءدارىسىن 25-تەن استام ستيۋارد پەن 2 كۋاگەر قاداعالاعان. تاۋەلسىز ستيۋاردتار 50 قاتىسۋشىدان جينالعان بەلگىلى ءبىر توپتى باقىلادى. كۋاگەرلەر GWR-ءدىڭ سەنىمدى وكىلى رەتىندە قىزمەت اتقارىپ، رەكوردتىڭ ورناۋى مەن كىتاپتىڭ بارلىق كريتەريىنىڭ تولىق ساقتالۋىن قاراستىردى.
Guinness World Records ەرەجەلەرىنە سايكەس اۋقىمدى ساباق باستالار الدىندا بارلىق قاتىسۋشى ەكى تىركەۋ ساتىسىنان وتكەن: ءبىرىنشىسى – جەكە بەيدجدەرىن سكانەرلەگەن جانە "كانديدات-ماركەر" باعدارلاماسى ارقىلى جيىن زالىن باقىلاعان، ەكىنشىسى – كەزەكشى قاتىسۋشىلاردىڭ مەحانيكالىق ەسەبىن جۇرگىزدى.
“ادىرنا” ۇلتتىق پورتالى
