اقتاۋ قالاسىنىڭ تۇرعىندارى قازاقتىڭ ۇلتتىق كيىمىن كيگەن ادامداردىڭ ءبىر جەردە ەڭ كوپ شوعىرلانۋى نوميناتسياسىندا گيننەس رەكوردىن جاڭارتتى، دەپ حابارلايدى "ادىرنا" ۇلتتىق پورتالى.
كاسپي تەڭىزىنىڭ جاعالاۋىنداعى ارنايى الاڭعا بەس مىڭنان استام ادام جينالىپ، قازاقتىڭ ۇلتتىق كيىمىن الەمگە پاش ەتتى. اۋا-رايىنىڭ سالقىندىعى مەن جاڭبىرعا قاراماستان، حالىقتىڭ مەرەكەلىك كوڭىل-كۇيى جوعارى بولدى.
رەكوردتى رەسمي تىركەۋ ءۇشىن لوندوننان گيننەس رەكوردتار كىتابىنىڭ شتاب-پاتەرىنەن ارنايى وكىل كەلىپ، جينالعان جۇرتشىلىقتى ناۋرىز مەرەكەسىمەن قۇتتىقتاپ، رەكورد ورناتىلعانى تۋرالى سەرتيفيكاتتى سالتاناتتى تۇردە تاپسىردى.
ءانشى تامارا اسار ينستاگرام جەلىسىندە وقىرماندارىنان ءسۇيىنشى سۇرادى.
"اعايىن!!! رەكورد ورناتىلدى!!!
بۇگىن 22 ناۋرىز كۇنى اقتاۋ قالاسىندا ۇلىستىڭ ۇلى كۇنى،ەلىمىزدىڭ مادەنيەتىن دارىپتەيتىن ۇلتتىق كيىم بويىنشا الەمدىك گيننەس رەكوردىن ورناتىلدى!!!
“Best fest Nauryz” شاراسىنا 5500 ادام تىركەلدى", - دەپ جازدى ول.
قاتىسۋشىلار الاڭعا تاڭعى ساعات 9-دان باستاپ جينالا باستادى. ساعات 11:00-دە ۇيىمداستىرۋشىلار 4 مىڭ ادامنىڭ كەلگەنىن، ال 12:01-دە قاتىسۋشىلار سانى 5 مىڭنان اسقانىن جاريالادى. وسى كەزدە الاڭ ۇستىنەن درون ۇشىرىلىپ، ناقتى دەرەكتەر ەكراندا كورسەتىلدى.
سەرتيفيكات تابىستالعان سوڭ، مەرەكەلىك شارا ءان مەن بيگە ۇلاسىپ، جينالعان حالىق ناۋرىز مەيرامىن ەرەكشە ءسان-سالتاناتپەن اتاپ ءوتتى.
