2015 جىلى ناۋرىزدىڭ باسىندا استاناداعى اۋداندىق پوليتسيا بولىمشەلەرىنىڭ بىرىنە 48 جاستاعى كەلىنشەك ارىزدانىپ، كۇيەۋىنىڭ ءىز-ءتۇزسىز جوعالىپ كەتكەنىن حابارلادى. Sputnik قازاقستان قىلمىستىق ماتەريالدارعا سۇيەنىپ، بەدەلدى بيزنەسمەننىڭ تاعدىرىن باياندايدى.

ءىس ساپارعا كەتتىم دەپ جوعالدى

پوليتسياعا كەلگەن ايەل ءوز كۇيەۋىن ەكى كۇننەن بەرى تابا الماي جۇرگەنىن جەتكىزدى. وتاعاسى الماتىعا ءىس ساپارمەن بارامىن دەگەن. سول كەتكەننەن حابارسىز كەتىپتى. "وعان بىردەڭە بولدى. ءىشىم سەزەدى. قاتتى الاڭداپ ءجۇرمىن", - دەدى سۆەتلانا.

قۇقىققورعاۋشىلار الدىمەن جوعالىپ كەتكەن كاسىپكەردىڭ كىم ەكەنىن زەردەلەي باستادى. سويتسە، 67 جاستاعى اناتولي ۇزاق جىلدار بويى ەلوردادا قۇرىلىس بيزنەسىمەن اينالىسقان. ساقشىلار ءبىر نارسەگە تاڭعالدى. وسى ۋاقىتقا دەيىن كاسىپكەر بىردە-ءبىر كيكىلجىڭگە ارالاسپاعان، ەشكىممەن جانجالداسپاي، ءوز كاسىبىن دوڭگەلەتە بەرگەن. بارلىق ارىپتەسى، ءتىپتى باسەكەلەستەرى ونىڭ جاقسى مىنەزى جايىندا جارىسا ايتتى.

پوليتسەيلەر استانالىق بيزنەسمەندى قىلمىسكەرلەردىڭ قۇربانى بولدى دەگەن شەشىمگە كەلدى. وعان ەكى سەبەپ بار. اناتولي ءىس ساپارعا شىققاندا وزىمەن بىرگە قوماقتى سوما قاراجات الىپ شىققان. قىلمىسكەرلەر سول اقشانى الىپ، كاسىپكەردى ءولتىرىپ كەتۋى مۇمكىن. قىلمىستىڭ تاعى ءبىر جولى – تۋىستارىنان تۇتقىننىڭ قۇنىن تالاپ ەتۋ. ونى ۇرلاپ اكەتىپ، ارتىنان اقشا بوپسالاۋى ىقتيمال.

سۆەتلانا تەرەزەلەردى نەگە اشىپ تاستادى؟

كۇندەر زىمىراپ ءوتىپ جاتتى. الايدا ءاناتوليدىڭ تۋىستارىنا ەشكىم حابارلاسقان جوق. كاسىپكەردىڭ ءوزى دە بايلانىسقا شىقپادى. تەرگەۋشىلەر فيرمانىڭ كەڭسەسىن اينالىپ جۇرە بەردى. ول جەردە جوعالعان كاسىپكەردىڭ اۆتوكولىگى تۇردى. باسقا ايعاق جوق ەدى. دەگەنمەن، ەكى اپتادان كەيىن وسى قىلمىستىڭ نازار اۋدارارلىق تاعى ءبىر نۇسقاسى شىعا كەلدى.

ءاناتوليدىڭ ءبىرىنشى نەكەسىنەن تۋعان قىزى پوليتسياعا كەلىپ، بىرنارسەگە قاتتى كۇدىكتەنىپ جۇرگەنىن جەتكىزدى. ونىڭ ايتۋىنشا، 3 ناۋرىزدا اكەسىن ىزدەپ بارعاندا سۆەتلانا ءۇيدىڭ بارلىق تەرەزەسىن اشىپ قويعان. ءوزى قالىڭ كيىنىپ الىپ، اياق كيىمىن دە شەشپەي ءجۇردى. ءۇي قاتتى سۋىپ كەتىپتى. پوليتسەيلەر بۇل دايەكتەردىڭ قىلمىسقا قانداي قاتىسى بار ەكەنىن بىلمەدى. بىراق سۆەتلانادان قايتادان جاۋاپ الۋعا شەشىم قابىلدادى.
جاۋاپ الۋ كەزىندە بۇرىنعى سۇراقتار قويىلدى. ال "3 ناۋرىزدا ءوز ۇيىڭىزدە تەرەزەنىڭ ءبارىن اشىپ تاستاپ، نەگە قالىڭ كيىنىپ ءجۇردىڭىز؟" دەگەن ساۋالدى ەستىگەندە سۆەتلانا جىلاپ جىبەردى.

"كۇيەۋىمدى ءىس ساپارعا جىبەرمەۋىم كەرەك ەدى. ءالى كۇنگە دەيىن ءوزىمدى كىنالى سەزىنىپ ءجۇرمىن. سول كۇنى مازام كەتتى، قاتتى الاڭدادىم. ءوزىمدى ناشار سەزىنگەننەن كەيىن تەرەزەلەردى اشىپ تاستادىم. ءسويتىپ، كىشكەنە باسىلامىن با دەپ ويلادىم", - دەدى ول.

سۆەتلانانىڭ ءسوزى سەنىمدى شىقتى. ونىڭ وتىرىك ايتىپ تۇرعانى بىلىنبەدى. الايدا تەرگەۋشىلەر ەرلى-زايىپتىنىڭ قارىم-قاتىناسى تۋرالى تولىعىراق بىلگەندى ءجون كوردى.

اناتولي جاس قىزدىڭ قۇرىعىنا قالاي ءتۇستى؟

پوليتسەيلەر الدىمەن تۋعان-تۋىستارىنان جاۋاپ الدى. ودان كەيىن دوستارىنىڭ ويىن تىڭدادى. سويتسە، اناتولي مەن سۆەتلانا سوناۋ 90-شى جىلداردىڭ ورتاسىندا كەزدەسكەن. ول كەزدە بيزنەسمەننىڭ كاسىبى دوڭگەلەنىپ تۇرعان بولاتىن. تاپسىرىس كوپ، اقشا دا از ەمەس. ءبىر بالاسى بار 18 جاستاعى قىز 37-دەن اسقان كاسىپكەردى وپ-وڭاي اينالدىرىپ الدى. ءاناتوليدىڭ ەكى بالاسى بار ەدى. سوعان قاراماستان، جاس قىزبەن كەزدەسىپ ءجۇردى.

باس كەزىندە تابىستى كاسىپكەر سۆەتلاناعا جەڭىل-جەلپى قارادى. الايدا ۋاقىت وتە كەلە، ونىڭ قۇرىعىنا قالاي تۇسكەنىن ءوزى دە بايقاماي قالدى. ەر ادام كوپ ۇزاماي ءبىرىنشى وتباسىن تاستاپ، جاس قىزبەن قوسىلعان. ول كەزدە سۆەتلانانىڭ اياعى اۋىر ەدى، ارتىنان قىز بالا دۇنيەگە كەلدى.

بالا تۋسا دا، جانجال ازايعان جوق. اناتولي بيزنەستىڭ قامىمەن ۇنەمى جۇمىستا ءجۇردى. ال جاس كەلىنشەك كلۋب پەن ديسكوتەكانى قالادى، قىدىرعاندى ۇناتاتىن. اقىرى ەكەۋى كەلىسە المايتىنىن ءتۇسىندى. سۆەتلانا ورتاق مۇلىكتىڭ جارتىسىن العاننان كەيىن قىزىنا دا قارامادى. "اكەسى تاربيە بەرسىن" دەپ كەتە باردى. سول كۇيى ۇشتى-كۇيلى جوق بولىپ كەتتى، قىزىنىڭ قال-جاعدايىن سۇراپ بىلگەن دە جوق.

قاراقشىلىق شابۋىل

اناتولي مەن سۆەتلانانىڭ ايىرىلىسقانىنا 10 جىل بولدى. وسى ۋاقىت ىشىندە اناتولي باسقا ايەلمەن قوسىلدى. ودان ءبىر قىزى دۇنيەگە كەلدى. بىراق سۆەتلانا ءۇشىن الىنبايتىن قامال بولمادى. بۇرىنعى كۇيەۋىنىڭ وسال جەرىن بىلە تۇرا، تاعى دا باسىن اينالدىرىپ، وزىنە قاراتىپ الادى. اناتولي كوپ ۇزاماي ءۇشىنشى ايەلىن تاستاپ، بۇرىنعى كەلىنشەگىنە قايتا قوسىلۋعا ۇسىنىس جاسايدى.

سۆەتلانا بىردەن كەلىسكەن جوق. "مەن تەك بىرگە تۇرعان پاتەرىمىزگە عانا بارامىن. قوسىلساق، كەزىندە ءوزىم كەتىپ قالعان ۇيگە بارىپ قوسىلامىن", - دەپ تالاپ قويادى. اناتولي قارسىلىق بىلدىرگەن جوق. ءسويتىپ، ءۇشىنشى ايەلى مەن قىزىنا پاتەر الىپ بەرەدى دە، بولەك شىعارادى. ءۇيىنىڭ ءىشىن تۇگەل جوندەپ، سۆەتلانانى كىرگىزەدى. ەكەۋى قوسىلعان سوڭ، بۇرىنعى ۇرىس-كەرىس قايتا باستالادى.

اناتولي مەن سۆەتلانانىڭ تەلەحيكاياعا ۇقساس ءومىرى تەرگەۋشىلەردى ويلاندىرماي قويمادى. الايدا ەشقانداي دالەلدەر بولمادى. سودان ساقشىلار ايەلدىڭ ىزىنە ءتۇسىپ، اڭدۋعا كوشەدى. سۆەتلانا ءجىتى باقىلاۋدا ەكەنىن سەزىپ قالادى.

بىرنەشە كۇننەن كەيىن كاسىپكەردىڭ ايەلى پوليتسياعا ءوزى بارىپ، كۇيەۋىنىڭ جوعالۋىنا قاتىستى تىڭ دەرەكتەردى جايىپ سالادى. ونىڭ سوزىنە قاراعاندا، 1 ناۋرىزدا تۇندە قاراقشىلار ۇيگە باسا كوكتەپ كىرگەن. ءاناتوليدى ۇرىپ-سوعىپ، اقشا تالاپ ەتىپتى. اقشا تاپپاعاننان كەيىن كۇيەۋىن ۇرلاپ كەتكەن.

كورشىلەر ول كۇنى ايعاي-شۋدىڭ بولعانىن راستادى. بىراق قاتتى داۋىستار باستالعان بويدا ساپ تىيىلعان. تەرگەۋشىلەر ءبىر نارسەنى تۇسىنبەي، دال بولدى. تۇنگى قاراقشىلار التىنشى قاباتتاعى پاتەرگە قالاي كىرگەن؟ تەرەزەلەر ءبۇتىن، ەسىك تە بۇزىلماعان. سۆەتلانانىڭ ءوزى وسى سۇراققا جاۋاپ بەرە المادى. دەگەنمەن، ايتقانىنان قايتقان جوق.

ءوز قولىمەن تۇنشىقتىرىپ تاستادى

تەرگەۋشىلەر ءاناتوليدىڭ ەشقايدا كەتپەگەنىن جانە سوڭعى رەت ءوز ۇيىندە بولعانىن انىقتادى. بىراق ءىلىپ الار دالەل بولمادى. سودان سوڭ ارنايى حيميالىق پرەپاراتتى قولدانىپ، پاتەردىڭ ءىشىن تاعى قاراپ شىعۋعا شەشىم قابىلداندى. ونىڭ كومەگىمەن ءبىر ءتۇيىر قاندى دا انىقتاۋعا بولاتىن ەدى.

حيميالىق پرەپاراتتى سەپكەننەن كەيىن قاننىڭ ىزدەرى جاتىن بولمەدەن جانە دالىزدەن تابىلدى. ال ۆاننادا قاننىڭ كوپ مولشەردە بولعانى انىقتالدى. سۆەتلانا ونداي تەكسەرىستىڭ ناتيجەسىنە اڭ-تاڭ بولدى، ساسىپ قالعاننان نە ايتارىن بىلمەدى. تەرگەۋشىلەر ايەلدىڭ جاڭا حيكاياسىن كۇتپەستەن بىردەن جاۋاپ الۋعا كىرىستى. وسى كەزدە ايەل ءوز كىناسىن مويىندادى.

سۆەتلانانىڭ ايتۋىنشا، سوڭعى ۋاقىتتا ەكەۋى ءجيى ۇرسىسىپ تۇردى. سەبەپ بىرەۋ – اقشا. اناتولي بۇرىنعىداي كوپ تابىس تاپپادى. ال سۆەتلانا ادەمى ءارى باي بولۋدى قالادى. كۇيەۋىنىڭ كوپ اقشا تاپپايتىنىن تۇسىنگەننەن كەيىن ءوز باقىتىن سىرتتان ىزدەي باستادى. اناتولي ءبارىن سەزىپ ءجۇردى.

1 ناۋرىزدا ەكەۋى تاعى قاتتى ۇرسىسىپ قالادى. سۆەتلانا كەتەمىن دەپ، جينالاۋعا كىرىسكەن. وسى كەزدە اناتولي ونىڭ قولىنان ۇستاپ، بولمەگە سۇيرەي باستادى. سودان ەكەۋى توبەلەسىپ كەتتى. سۆەتلانا ونى قاتتى يتەرىپ جىبەرەدى. كۇيەۋى باسىن سوعىپ، ەسىنەن تانىپ قالادى. ايەلى ۇستىنە ءمىنىپ الادى دا، ءوز قولىمەن تۇنشىقتىرىپ تاستايدى.

ءمايىتتى اناسىنىڭ قابىرىنە اپارعان

سۆەتلانا كۇيەۋىن ولتىرگەننەن كەيىن دەنەسىنەن قۇتىلۋدىڭ امالىن قاراستىرادى. سودان ءبىر عانا ءادىسىن ويلاپ تاپتى. ءمايىتتى ۆانناعا اپارىپ، بولشەكتەپ، سودان سوڭ بولەك-بولەك پاكەتتەرگە سالىپ، ەكى كۇن بويى ۇيدە ۇستايدى. ءدال سول كەزدە ءاناتوليدىڭ ءبىرىنشى نەكەدەن تۋعان قىزى كەلىپ كەتكەن.

قىلمىسكەر ايەل ءمايىت بولشەكتەرىن بىرتىندەپ شىعارعان. بىراق كۇل-قوقىسقا لاقتىرمادى. ايدالاعا كومگەن دە جوق. زيراتقا اپارىپ، ءوز اناسىنىڭ قابىرىنە تاستايدى. سويتسە، بۇل ءاناتوليدىڭ ءوز ءوتىنىشى بولعان ەكەن. تويدان كەيىن ول سۆەتلانانىڭ اناسىمەن تەز ءتىل تابىسىپ، ءوز اناسىنداي جاقسى كورىپ كەتىپتى. ەنەسى قايتىس بولعاندا ءوزىن سونىڭ قاسىنا جەرلەسىن دەپ ءوتىنىش بىلدىرگەن. سۆەتلانا كۇيەۋىنىڭ ءوتىنىشىن ورىندادى. بىراق جەر قاتىپ تۇرعاننان كەيىن قابىردى قازا المادى. پاكەتتەردى قارمەن جابا سالدى.

سوتتا سۆەتلانا كۇيەۋىن ادەيى ولتىرگەن جوقپىن دەپ شىقتى. مۇنىڭ ءبارى وقىس وقيعا دەدى. ونىڭ ايتۋىنشا، اناتولي ونى ىلعي ۇرىپ-سوعىپ، كەمسىتەتىن.

سوتتىڭ شەشىمىمەن سۆەتلانا ون جىلعا باس بوستاندىعىنان ايىرىلدى.