تانىمال ءانشى ماقپال ءجۇنىسوۆا جەلىدەگى پاراقشاسىندا ۇشاققا دومبىراسىمەن بىرگە كىرە الماعانىن ايتتى، دەپ حابارلايدى "ادىرنا" ۇلتتىق پورتالى.
ءانشى جەلىدەگى پاراقشاسىندا دومبىراعا ارنالعان قوسىمشا ورىننىڭ باعاسى 59 مىڭ تەڭگە بولعانىن ايتىپ، شاعىمداندى.
«دومبىرا دەپ كورسەتپەسە دە، ونى 59 مىڭ تەڭگەگە ارەڭ وتكىزدىك. بۇل – مەن ءۇشىنشى رەت وسىنداي جاعدايعا تاپ بولىپ وتىرمىن»، – دەدى ماقپال ءجۇنىسوۆا.
وسىعان ساي، دومبىرانى بورتقا كىرگىزبەگەن FlyArystan ءانشىنىڭ شاعىمىنا جاۋاپ بەردى. كومپانيا سوزىنشە، مۋزىكالىق اسپاپتاردى تاسىمالداۋ بويىنشا ەرەجەلەر بار. ەرەجەگە ساي، اسپاپتى سالونعا الىپ وتۋگە تەك قول جۇگى رەتىندە رۇقسات بەرىلەدى، ەگەر ونىڭ سالماعى 5 كگ اسپاسا جانە كولەمى 56x23x36 سم-دەن ۇلكەن بولماسا.
ەگەر جۇك نە اسپاپ اتالعان ەرەجەگە ساي بولماسا، قوسىمشا قارجى تولەۋ كەرەك.
«ءبىز بارلىق ونەر يەلەرىنىڭ ەڭبەگىن جوعارى باعالايمىز جانە حالقىمىز ءۇشىن قاسيەتتى دومبىرانىڭ قۇندىلىعىن تۇسىنەمىز. دەگەنمەن، بارلىق جولاۋشىلارعا تەڭ قارىم-قاتىناس كورسەتۋ جانە ورتاق ەرەجەلەردى ساقتاۋ – قاۋىپسىزدىكتى قامتاماسىز ەتۋدىڭ كەپىلى»، – دەلىنگەن FlyArystan حابارلاماسىندا.
ايتا كەتەيىك، كولىك ءمينيسترى مارات قاراباەۆ ۇشاققا مۋزىكالىق اسپاپپەن ەسكەرتۋسىز كەلەتىندەرگە رەنىشىن بىلدىرگەن بولاتىن.
بۇعان دەيىن قازاقستاندىق ايگىلى سكريپكاشى مارات بيسەنعاليەۆ الەۋمەتتىك جەلىدەگى پاراقشاسىندا FlyArystan اۋە كومپانياسىنىڭ جۇمىسىنا كوڭىلى تولمايتىنىن جازعان. سەبەبى ەكيپاج اسپاپتى ۇشاققا كىرگىزبەگەن.
بۇعان دەيىن ايتىسكەر اقىن ايشولپان تىلەۋتايعا Fly Arystan ۇشاعىنا دومبىرا الىپ كىرۋگە رۇقسات بەرمەي قويعانىن ءمالىم ەتكەن ەدى. Fly Arystan كومپانياسىنىڭ قىزمەتكەرلەرى «دومبىرانى ۇشاققا كىرگىزبەيسىڭ»دەپ ونى جۇلقىلاعان. كومپانيانىڭ دومبىراعا قاتىستى ارەكەتىمەن وزگە دە انشىلەر ەركىن شۇكىمان مەن ەرلان رىسقالي دا بەتپە-بەت كەلگەن.
