Tanymal ánshi Maqpal Júnisova jelidegi paraqshasynda ushaqqa dombyrasymen birge kire almaǵanyn aıtty, dep habarlaıdy "Adyrna" ulttyq portaly.
Ánshi jelidegi paraqshasynda dombyraǵa arnalǵan qosymsha orynnyń baǵasy 59 myń teńge bolǵanyn aıtyp, shaǵymdandy.
«Dombyra dep kórsetpese de, ony 59 myń teńgege áreń ótkizdik. Bul – men úshinshi ret osyndaı jaǵdaıǵa tap bolyp otyrmyn», – dedi Maqpal Júnisova.
Osyǵan saı, dombyrany bortqa kirgizbegen FlyArystan ánshiniń shaǵymyna jaýap berdi. Kompanııa sózinshe, mýzykalyq aspaptardy tasymaldaý boıynsha erejeler bar. Erejege saı, aspapty salonǵa alyp ótýge tek qol júgi retinde ruqsat beriledi, eger onyń salmaǵy 5 kg aspasa jáne kólemi 56x23x36 sm-den úlken bolmasa.
Eger júk ne aspap atalǵan erejege saı bolmasa, qosymsha qarjy tóleý kerek.
«Biz barlyq óner ıeleriniń eńbegin joǵary baǵalaımyz jáne halqymyz úshin qasıetti dombyranyń qundylyǵyn túsinemiz. Degenmen, barlyq jolaýshylarǵa teń qarym-qatynas kórsetý jáne ortaq erejelerdi saqtaý – qaýipsizdikti qamtamasyz etýdiń kepili», – delingen FlyArystan habarlamasynda.
Aıta keteıik, Kólik mınıstri Marat Qarabaev ushaqqa mýzykalyq aspappen eskertýsiz keletinderge renishin bildirgen bolatyn.
Buǵan deıin qazaqstandyq áıgili skrıpkashy Marat Bısenǵalıev áleýmettik jelidegi paraqshasynda FlyArystan áýe kompanııasynyń jumysyna kóńili tolmaıtynyn jazǵan. Sebebi ekıpaj aspapty ushaqqa kirgizbegen.
Buǵan deıin aıtysker aqyn Aısholpan Tileýtaıǵa Fly Arystan ushaǵyna dombyra alyp kirýge ruqsat bermeı qoıǵanyn málim etken edi. Fly Arystan kompanııasynyń qyzmetkerleri «dombyrany ushaqqa kirgizbeısiń»dep ony julqylaǵan. Kompanııanyń dombyraǵa qatysty áreketimen ózge de ánshiler Erkin Shúkiman men Erlan Rysqalı da betpe-bet kelgen.
