FlyArystan اۋە كومپانياسى 12 جاستاعى قىز بالانى بورتقا كىرگىزبەي، استانا اۋەجايىندا قالدىرىپ كەتكەن. بۇل تۋرالى ءجاسوسپىرىمنىڭ اناسى جازيرا مۋسينا ايتتى، دەپ حابارلايدى “ادىرنا” ۇلتتىق پورتالى.
«2024 جىلدىڭ 20 شىلدەسىندە مەنىڭ بالالارىم (ەگىز) عاليەۆا زەرە مەن عاليەۆا زاۋرە امەريكادان ۇيگە ورالدى. بالالار توبىمەن بىرگە سەنىمدى ادامنىڭ جەتەكتەۋىمەن استانا ارقىلى ورالعا ۇشقان... Flyarystan قىزمەتكەرلەرى زاۋرەنى تىركەپ، زەرەنى تىركەمەي قويعان. ولار تەحنيكالىق اقاۋلاردى جوندەگەن سوڭ بالانى بورتقا وزدەرى وتىرعىزاتىنىن ايتىپ، توپتىڭ جەتەكشىسىن سەندىرگەن. مەنىڭ بالالارىمنىڭ بۇكىل قۇجاتى دۇرىس. سوندا FlyArystan قىزمەتكەرلەرى ۇشاقتا ورىن جوق بولعانى ءۇشىن بالامدى كىرگىزبەي قويعان با؟ ۇشاق ورالعا ۇشىپ كەتكەن، ال مەنىڭ قىزىم زەرە استانا اۋەجايىندا قاراۋسىز قالىپ قالعان»، - دەدى ول.
12 جاسار زەرە 3 ساعات بويى FlyArystan تىركەۋىنىڭ جانىندا وتىرعان. اناسىنا «نە ىستەيمىن، قايدا بارامىن» دەپ جىلاپ تەلەفون سوققان.
«بالا كەلەسى كۇنى باسقا رەيسپەن ۇلكەن كىسىنىڭ قاراۋىنسىز ۇشىپ كەلدى. ول ءبىزدىڭ قاسىمىزدا، امان-ەسەن. بىراق بولعان جاعدايدى ۇمىتا الار ەمەسپىن، ويتكەنى بۇل كەز-كەلگەن بالانىڭ باسىنا ءتۇسۋى مۇمكىن. بالاعا نەمقۇرايلى، جاۋاپسىز قاراۋدىڭ ارتى قورقىنىشتى جاعدايلارعا اكەپ سوعۋى مۇمكىن»، - دەدى ول.
جازيرا مۋسينا بالانىڭ قاۋىپسىزدىگىنە نەمقۇرايلى قاراعان كومپانيانىڭ ارەكەتىنە اشۋلى. ول ازاماتتىق اۆياتسيا كوميتەنىنە جانە بالا قۇقىقتارى جونىندەگى ۋاكىل دينارا زاكيەۆاعا جۇگىنگەن.
«ءبىز FlyArystan-نىڭ ءىس-ارەكەتىنە تەكسەرۋ جۇرگىزىلىپ، كامەلەتكە تولماعان بالانىڭ قۇقىعىن بۇزعانى ءۇشىن جاۋاپقا تارتىلادى دەپ ۇمىتتەنەمىز»، - دەپ جازدى جازيرا مۋسينا.
اۋە كومپانياسى ارتىنشا كەشىرىم سۇراعان.
«ءبىز بولعان جاعدايعا بايلانىستى شىن جۇرەكتەن كەشىرىم سۇرايمىز. اۆياكومپانيا مۇقيات تەكسەرىس جۇرگىزەدى، قابىلدانعان شارالار تۋرالى سىزگە مىندەتتى تۇردە حابارلايمىز»، - دەپ جاۋاپ بەرگەن FlyArystan قىزدىڭ اناسىنا.
