FlyArystan اۋە كومپانياسىنىڭ 7056 استانا–الماتى كوممەرتسيالىق رەيسىندە ۇشۋعا دايىندىق بارىسىندا اۋە كەمەسىنىڭ كابيناسىنا ازاماتتىق كيىمدەگى ەكى ايەلدىڭ ەركىن كىرىپ، ۇشقىشتارمەن سويلەسىپ وتىرعانى تۋرالى اقپارات تارادى. وقيعا جولاۋشىلاردىڭ كوز الدىندا ورىن العان. بۇل تۋرالى ءماجىلىس دەپۋتاتى مۇرات ابەنوۆ Facebook پاراقشاسىندا جازدى، دەپ حابارلايدى “ادىرنا”.
اۋە قاۋىپسىزدىگى نورمالارىنا سايكەس، ۇشقىشتار كابيناسى قاتاڭ تۇردە ستەريلدى ايماق بولىپ سانالادى. بۇل ايماققا تەك اۋە كەمەسى كومانديرىنىڭ رۇقساتىمەن بورتسەرىكتەر عانا كىرە الادى. بوتەن ادامداردىڭ كىرۋى – حالىقارالىق جانە ۇلتتىق تالاپتاردىڭ ورەسكەل بۇزىلۋى.
وقيعاعا كۋا بولعان جولاۋشى، ءماجىلىس دەپۋتاتى مۇرات ابەنوۆ ماسەلە بويىنشا ازاماتتىق اۆياتسيا كوميتەتىنىڭ ءتورايىمى سالتانات تومپيەۆاعا تىكەلەي حابارلاسىپ، ءتيىستى ورگانداردىڭ شۇعىل ارەكەت ەتۋىن سۇراعانىن مالىمدەدى.
دەپۋتات سونداي-اق، قر باس پروكۋراتۋراسىن، كولىكتەگى پوليتسيا دەپارتامەنتىن، قر ىشكى ىستەر مينيسترلىگىن ۇشاق الماتى قالاسىنا قونعاننان كەيىن تەكسەرۋ جۇرگىزۋگە جانە زاڭعا سايكەس ەڭ قاتاڭ شارالار قولدانۋعا شاقىردى.
Fly Arystan كومپانياسى وقيعاعا قاتىستى رەسمي تۇسىنىكتەمە بەردى.
«رەيستە ەكيپاج كابيناسىندا بولعان ەكى ادام — كومپانيانىڭ ءوز قىزمەتكەرلەرى. ولاردىڭ كابينادا بولۋى اۋە كەمەسىنىڭ كومانديرىمەن تولىق كەلىسىلگەن جانە قولدانىستاعى تارتىپكە سايكەس جۇزەگە اسىرىلعان.
كومپانيانىڭ مالىمەتىنشە، قىزمەتكەرلەر بارلىق مىندەتتى وقۋ-جاتتىعۋلاردان وتكەن، ولاردىڭ قولىندا جارامدى رۇقساتتار مەن قىزمەتتىك كۋالىكتەر بولعان. كۋالىكتەر كورىنەتىن جەردە ورنالاستىرىلىپ، ولاردىڭ مارتەبەسىن، وكىلەتتىگىن جانە اۋە كەمەسىندە بولۋ قۇقىعىن راستايدى.
اۋە كومپانياسى قىزمەتكەرلەردىڭ كابينادا ورنالاسۋى بارلىق تالاپتارعا ساي جۇرگىزىلگەنىن اتاپ ءوتتى. بۇل ارەكەت اۆياتسيالىق قاۋىپسىزدىك نورمالارىن، ىشكى رەگلامەنتتەردى نەمەسە پەرسونالدىڭ كىرۋ ستاندارتتارىن ەشقانداي بۇزباعان
ال ازاماتتىق اۆياتسيا كوميتەتى اتالعان فاكتى بويىنشا تەكسەرىس جۇرگىزىلەتىنىن ايتتى.
“قۇرمەتتى مۇرات ابدۋلاميتۇلى! حابارىڭىز ءۇشىن العىس بىلدىرەمىز. اتالعان فاكتى بويىنشا تەكسەرۋ جۇرگىزىلەدى جانە ەگەر اۆياتسيالىق قاۋىپسىزدىك تالاپتارىنىڭ بۇزىلعانى راستالسا، جاۋاپتى تۇلعالارعا ءتيىستى شارالار قولدانىلادى”، - دەلىنگەن حابارلامادا.
